22.06.2026 | 16:24
ՍԴ-ն փաստաթղթեր է պահանջել մի շարք պետական մարմիններից․ ՔՊ-ն որպես 3-րդ անձ է ներգրավվել
Թուրքիան ՌԴ-ից ներկրվող բնական գազի համար հատուկ գին է ցանկանում ստանալ
Քաղաքականություն
01.11.2024 | 18:26
Թուրքիայի Էներգետիկայի և բնական պաշարների նախարար Ալփարսլան Բայրաքթարը Milliyet-ի հետ հարցազրույցում հայտարարություններ է արել Ռուսաստանի հետ բնական գազի ներկրման պայմանագրի շուրջ բանակցություններում Անկարայի պահանջների մասին։
Բնական գազը մատակարարվում է Թուրքիայի խոշորագույն գազամատակարարող Ռուսաստանից՝ երկու խողովակաշարով։ «Կապույտ հոսք» գազատարի պայմանագիրը, որը մեծ ծավալի մատակարարման պայմանագիր է՝ տարեկան 16 միլիարդ խորանարդ մետր, կավարտվի հաջորդ տարվա վերջին:
Թուրք նախարարը նշել է, որ Անկարան հատուկ գին է ուզում ստանալ ՌԴ-ից մատակարարվող գազի համար։
«Որպես Թուրքիա՝ մենք հատուկ գին ենք ուզում մեզ համար։ Մենք ուզում ենք այնպիսի մեխանիզմ գործադրել, որը կպաշտպանի և՛ մեզ, և՛ արտադրող երկրին։ Պետք է լինի առաստաղ և նվազագույն գին, այն, ինչ մենք անվանում ենք թունելի գնագոյացում։ Եթե Եվրոպայում գազը թանկանա, մենք մատակարարման անվտանգության խնդիր չունենք, բայց չենք ուզում, որ դա բացասական ազդեցություն ունենա գնի վրա»,- ասել է Բայրաքթարը։
Անդրադառնալով Թուրքիայում ծրագրվող բնական գազի հանգույցի ստեղծմանը՝ Բայրաքթարը հայտարարել է, որ BOTAŞ-ի և ռուսական «Գազպրոմի» համար ստեղծվել են ենթակառուցվածքներ՝ համատեղ գազի առևտրային հարթակ գործարկելու համար, և որ հարթակը կարող է շահագործման հանձնվել 2025 թվականին։
Թարգմանությունը՝ Էմմա Չոբանյանի
