Նոտաներ չիմացող կոմպոզիտորների, քառակուսի մտածողության և ձանձրալի երաժշտության մասին. ապաքաղաքական զրույց Նարինե Զարիֆյանի հետ. ՏԵՍԱՆՅՈՒԹ

Factor TV-ի A-politic հաղորդաշարի հյուրն է կոմպոզիտոր, Երևանի Կոմիտասի անվան պետական կոնսերվատորիայի պրոֆեսոր Նարինե Զարիֆյանը: Նրա կարծիքով՝ «փոփ-երաժշտությունը», ըստ էության, նույն էստրադային երաժշտությունն է: Պարզապես խորհրդային էստրադայում հարմոնիկ լուծումներն ավելի պարզ էին, քան Արևմուտքում նույն ժանրի երաժշտության մեջ: Այն ամբիոնը, որը ղեկավարում է կոմպոզիտորը, կոչվում է «ջազ-փոփ երաժշտության ամբիոն»: Սակայն, հաղորդման հյուրի պնդմամբ, շեշտը դրվում է ջազային երաժշտության վրա, որը, նրա կարծիքով, պետք է ուսումնասիրվի ու դասավանդվի կոնսերվատորիայում:

Հնարավո՞ր է, արդյոք, ուսանողներին սովորեցնել ջազային իմպրովիզացիաներ անել: Նարինե Զարիֆյանը կարծում է, որ թեև դա բնատուր ձիրք է, այնուամենայնիվ, հնարավոր է զարգացնել: Կոմպոզիտորն այդ նպատակով մշակել է վարժություններ հարց ու պատասխանի ձևով, որոնց տարբերակները ներկայացրել է երաժշտական դպրոցներին: Դա կարևոր է նաև այն առումով, որ երեխաների մոտ զարգացնում է ազատ, անկաշկանդ, «ոչ քառակուսի» մտածելակերպը՝ անկախ նրանից, թե ինչ մասնագիտություն են ընտրելու:

Այժմ կոմպոզիտորներից շատերը ստեղծագործում են համակարգչի օգնությամբ: Սակայն հաղորդման հյուրը գերադասում է «պապենական մեթոդները»՝ մատիտով գրել նոտաները պարտիտուրի մեջ: Այդպես, կոմպոզիտորի կարծիքով, կարելի է լսել այն, ինչ պետք է վերածվի ձայների և հաշվի առնել կենդանի կատարման հնարավորությունները: Համակարգչով ստեղծածը տեխնիկական որևէ սահմանափափակում չունի, և երբ նման պարտիտուրը բերվում է սիմֆոնիկ նվագախումբ, դա երաժիշտների մոտ քմծիծաղ է առաջացնում:

Մանրամասները՝ տեսանյութում:

Արամ Աբրահամյան