04.06.2026 | 20:39
Գերմանիան առաջին անգամ չի ընտրվել ՄԱԿ-ի ԱԽ ոչ մշտական անդամ․ դրա համար Բեռլինը մեղադրում է ՌԴ-ին
Ստալինի կիսանդրու, սովետական բանտի և Վարդան Մամիկոնյանի արձանի խորհրդի մասին. ապաքաղաքական զրույց Կարինե Քոչարի հետ․ ՏԵՍԱՆՅՈՒԹ
Հաղորդաշարեր
05.05.2024 | 21:00
Factor TV-ի A-politic հաղորդաշարի հյուրն է Երվանդ Քոչարի թանգարանի տնօրեն Կարինե Քոչարը: Նրա կարծիքով՝ Վարպետի կյանքի և ստեղծագործություն մի մեծ ժամանակահատված՝ 1923-36 թվականները, երբ նա ապրում էր Փարիզում, դեռևս լավ չի ուսումնասիրված: Մեր տեղեկություններն այդ շրջանի մասին հիմնականում սահմանափակվում են ֆրանսիական թերթերի հրապարակումներով և Քոչարի՝ հարազատներին գրված նամակներով: Մինչդեռ, հաղորդման հյուրի կարծիքով, Ֆրանսիայի արխիվները կարող են տալ ավելի համապարփակ պատկեր:
Ֆրանսիայում գտնվելու վերջին շրջանում Քոչարը կերտել էր Ստալինի կիսանդրին, որը չի պահպանվել, կա միայն լուսանկարը: Կարինե Քոչարը չի կարծում, որ նման թեմայի դիմելը տուրք էր քաղաքական կոնյուկտուրայի։ Արվեստագետը, ըստ նրա, արտացոլել էր ստալինիզմի էությունը:
Մյուս կողմից, 1936 թվականին վերադառնալով Խորհրդային Հայաստան՝ նա չէր պատկերացնում, թե ինչ է իրեն սպասում: Ինչպես հայտնի է՝ Վարպետը մոտ 2,5 տարի անցկացրել է բանտում՝ չնայած որևէ մեղադրանք նրան չի առաջադրվել:
Խոսելով Վարդան Մամիկոնյանի արձանի մասին՝ Կարինե Քոչարը հուշում է, որ դրանում կոդավորված է խաչի խորհուրդը, քանի որ հայ զորավարը պայքարում էր հենց քրիստոնեական հավատի համար: 1975 թվականին աթեիստական երկրում այդ թեմաների մասին կարելի էր խոսել միայն «կոդերով»:
Մանրամասները՝ տեսանյութում:
Արամ Աբրահամյան
