Էռնեկյանի ընկերությունը բանակցում է ՀՀ կառավարության հետ․ կէժանանա՞ն արդյոք «Զվարթնոց» միջազգային օդանավակայանի ծառայությունները

Factor.am-ի տեղեկություններով՝ արգենտինահայ գործարար Էռնեկյանին պատկանող «Կորպորասիոն Ամերիկա Ս․Ա․» ընկերությունը մտադիր է երկարացնել Երևանի «Զվարթնոց» միջազգային օդանավակայանի կոնցեսիոն կառավարման պայմանագրի ժամկետը և այդ նպատակով բանակցություններ է սկսել ՀՀ կառավարության հետ։

Պայմանագիրը, որով «Զվարթնոց» օդանավակայանը հանձնվել է «Կորպորասիոն Ամերիկա»-ի հավատարմագրային կառավարմանը (2007թ-ից ներառում է նաև Գյումրու «Շիրակ» օդանավակայանը), կնքվել է 2001 թ-ին և ուժի մեջ մտել 2002 թ-ին՝ 30 տարով։ Այսինքն՝ դրա ժամկետը լրանում է 2032 թ-ին։ Դրանից հետո, ըստ պայմանագրի, կառավարիչն իրավունք ունի միակողմանիորեն յուրաքանչյուր 5 տարին մեկ անգամ անսահմանափակ երկարաձգել այն: Բայց քանի որ արգենտինական ընկերությունը ցանկանում է պայմանագիրը երկարացնել առնվազն 50 տարով, դրա համար բանակցում է ՀՀ կառավարության հետ։

Տեղեկությունը ճշտելու համար դիմեցինք ՀՀ կառավարություն, որը մեր հարցումը վերահասցեագրեց Տարածքային կառավարման և ենթակառուցվածքների նախարարություն։ 1 ամիս 5 օր անց ստացանք փոխնախարար Արմեն Սիմոնյանի պատասխանը, որն, ըստ էության, չի հերքել մեր տեղեկությունը։

«ՀՀ վարչապետի՝ «Միջգերատեսչական հանձնաժողով ստեղծելու և դրա կազմը հաստատելու մասին» 2023 թ․ 93-Ա որոշմամբ ՀՀ կառավարության և Կորպորասիոն Ամերիկա Ս․Ա-ի միջև «Զվարթնոց» միջազգային օդանավակայանի ներդրումային ծրագրի՝ կոնցեսիոների կողմից իրականացվելիք ներդրումների և պայմանագրային պարտավորությունների գնահատման նպատակով ստեղծվել է միջգերատեսչական հանձնաժողով, որը բանակցում է «Կորպորասիոն Ամերիկա» ընկերության հետ։ Նշված բանակցությունները դեռ չեն ավարտվել»,- նշել է Սիմոնյանը։

Նախարարությունից նաև հայտնել են, որ, ըստ «Արմենիա» միջազգային օդանավակայաններ» ՓԲԸ-ի տեղեկատվության, մինչ օրս կատարված ներդրումների չափը կազմում է 373,989,381 ԱՄՆ դոլար և ընկերությունը չունի չկատարված որևէ պարտավորություն։

Կփորձի՞ արդյոք ՀՀ կառավարությունը վերանայել «Կորպորասիոն Ամերիկայի» հետ պայմանագրի դրույթները, պարզ չէ: Գործող պայմանագրով կառավարչի համար սահմանված է առնվազն 20 % ներքին շահութաբերություն։

Մասնագետները փաստում են, որ «Զվարթնոցը» համարվում է տարածաշրջանի ամենաթանկ օդանավակայանը: Դեռ 2012-ին դա արձանագրվել էր նաև ԱՄՆ-ի Զարգացման միջազգային գործակալության Հայաստանի քաղավիացիայի ոլորտի վերաբերյալ զեկույցում։
ՀՀ կառավարության 2024-2026 թթ․ միջնաժամկետ ծախսերի ծրագրի համաձայն՝ մինչև 2019 թվականը «Կորպորասիոն Ամերիկա Ս.Ա.» ընկերությունը, որը աշխարհի օդանավակայանների խոշորագույն օպերատորներից է, արձանագրում էր շահութաբերության բարձր ցուցանիշներ, իսկ ՀՀ-ի դուստր ձեռնարկությունը եղել է ամենաշահութաբերներից մեկը: Համավարակի ճգնաժամից հետո ֆինանսական վիճակը վերականգնվել է, միաժամանակ «Արմենիա միջազգային օդանավակայանններ» ՓԲԸ-ն լավ է դիմակայել 44-օրյա պատերազմի, Ռուսաստան-Ուկրաինա պատերազմի, 2022 թվականի սեպտեմբերյան ադրբեջանական ներխուժման հետևանքով ստեղծված մարտահրավերներին: Կառավարության ծրագրում նաև արձանագրվել է, որ «Կորպորասիոն Ամերիկան» հայտարարել է «Զվարթնոց» օդանավակայանի ընդլայնման մասին, որը ենթադրում է ՝ հզորությունների կրկնապատկում և մոտ 400 մլն ԱՄՆ դոլար ներդրումներ։

Գայանե Խաչատրյան