iPhone և Samsung մեգահսկաների մրցավազքը՝ արհեստական բանականության կիրառմամբ

Հավանաբար դուք նույնպես տեսել եք այն գովազդները, որտեղ սմարթֆոն արտադրողները ներկայացնում են իրենց արտադրանքի հզորությունը՝ տեսախցիկի միջոցով։ Վերջին տարիներին գովազդի թիրախում լուսինն է։ Մարդիկ սիրում են այն նկարել և սմարթֆոն ստեղծողները որոշել են բարելավել տեսախցիկի որակն ու հզորությունը։ Իրակա՞ն է այն, թե՞ հիմնված է արհեստական բանականության կողմից գեներացվող տվյալների վրա։

Տեսախցիկից մինչև հաղորդակցություն և օգտատիրոջ կարիքների հիման վրա ձևավորվող ֆունկցիոնալ։ Ժամանակակից սմարթֆոնները նույնպես հագեցած են արհեստական բանականության էլեմենտներով, որոնց մասին ոչ բոլորը գիտեն։ Այս նյութում մենք կանդրադառնանք 2 ամենահայտնի բրենդներին՝ iPhone-ին և Samsung-ին։

Սմարթֆոնների համաշխարհային շուկայում կա մոտավորապես 1,1 միլիարդից ավելի Samsung-ի օգտատեր: Սա 2023 թվականին ամբողջ աշխարհում սմարթֆոն օգտագործողների մոտավորապես 14%-ն է:

Samsung Galaxy S24 շարքը զգալի թռիչք է արձանագրել արհեստական բանականության (AI) հատկանիշները սմարթֆոնների մեջ ինտեգրելու հարցում՝ վերասահմանելով օգտատերերի փոխազդեցությունն ու անվտանգությունը՝ միաժամանակ առաջ մղելով շրջակա միջավայրի կայունությունը և տեխնոլոգիական առաջընթացը:

Galaxy S24 շարքը, որը բաղկացած է Galaxy S24, S24+ և S24 Ultra-ից, ներկայացնում է Galaxy AI փաթեթը՝ AI-ով աշխատող գործառույթների հավաքածու, որն ուղղված է օգտատերերի փորձի բարելավմանը տարբեր տիրույթներում: Առանձնահատկություններից մեկը սարքում տվյալների մշակման հնարավորությունն է, որն օգտատերերին հնարավորություն է տալիս հրաժարվել ամպային մշակումից՝ լրացուցիչ գաղտնիության համար (SamMobile): Ըստ ընկերության,  այս մոտեցումն ընդգծում է Samsung-ի հավատարմությունը օգտատերերի անվտանգության և գաղտնիության կարևորմանը։ Այն օգտագործում է ընկերության Knox հարթակը, որը լռելյայն (default) տեղադրված է սմարֆոնների մեջ և հանդիսանում է անվտանգության երաշխիք՝ առաջարկելով օգտատերերին վերահսկել իրենց տվյալների օգտագործումը AI հավելվածներում:

Samsung-ի համագործակցությունը Google-ի հետ հանգեցրել է նորարարական գործառույթների, ինչպիսին է Live Translate-ը, որն ապահովում է ձայնային և տեքստային թարգմանություններ մինչև 13 լեզուներով՝ ապահովելով անխափան հաղորդակցություն։ Այսինքն, դուք կարող եք զանգի միջոցով շփվել մեկի հետ՝ առանց լեզվին տիրապետելու, սմարթֆոնը կիրականացնի համաժամանակյա թարգմանություն։ Google-ի հետ այս համագործակցությունը նաև վերաբերում է որոնման հնարավորությանը՝ թույլ տալով օգտատերերին ինտուիտիվ կերպով տեղեկատվություն որոնել անմիջապես իրենց էկրաններից՝ առանց հավելվածներ փոխելու: Ավելին, Galaxy S24 Ultra-ն ուժեղացնում է բովանդակության ստեղծման հնարավորություններն իր ProVisual Engine-ի և տեսախցիկի մի շարք բարելավումների շնորհիվ՝ ավելի մատչելի  դարձնելով պրոֆեսիոնալ որակի տեսանյութերի և լուսանկարների նկարահանումը։

Իսկապես՝ Samsung Galaxy-ի տեսախցիկներն օգտագործում են արհեստական ինտելեկտը՝ լուսնի լուսանկարները բարելավելու համար: Նրանց Scene Optimizer ֆունկցիան, որն առկա է Galaxy S21 սերիայից ի վեր, կիրառում է խորը ուսուցման վրա հիմնված AI՝ լուսանկարներում լուսնի մանրամասները ճանաչելու և ընդլայնելու համար: Այս գործընթացը ներառում է 10-ից ավելի պատկերների համադրում` լուծաչափը (resolution), հստակությունն ու պայծառությունը բարելավելու համար, որոնք հատուկ հարմարեցված են լուսինը լուսանկարելու համար: Բացի այդ, Zoom Lock-ի նման գործառույթները նվազեցնում են ցնցումների էֆեկտները՝ ապահովելով կայուն պատկերներ նույնիսկ մեծացման (zoom) բարձր մակարդակներում՝ առանց եռոտանու (շտատիվ):

Ըստ ընկերության, այս AI կատարելագործումը չի կեղծում լուսնի լուսանկարները, այլ ավելի շուտ ընդլայնում է մանրամասները՝ հիմնված տեսախցիկի ճանաչման և մշակման հնարավորությունների վրա:

Samsung սմարթֆոնների նոր թողարկումները նաև գերհագեցած են պատկերի, գործընթացների կառավարման, գրաֆիկայի ապահովման տեխնոլոգիաներով, որոնք թույլ են տալիս բեռնել և խաղալ խաղեր՝ AI բաղադրիչով, որտեղ խաղի սցենարը կարող է գեներացվել հընթացս՝ ելնելով օգտատիրոջ փորձառությունից։

Զուգահեռ այս ամենին, Samsung-ը շարունակում է իր ճանապարհորդությունը դեպի կայուն՝ բնապահպանական արտադրություն Galaxy S24 սերիայի միջոցով՝ իր սարքերում ներառելով վերամշակված նյութեր: Սա ներառում է վերամշակված կոբալտի օգտագործումը մարտկոցներում և հազվագյուտ հողային տարրերի օգտագործումը բարձրախոսներում, ինչպես նաև սարքի կառուցվածքում վերամշակված պողպատի և ջերմապլաստիկ պոլիուրեթանի (TPU) ներդրումը: Ավելին, Galaxy S24 սերիայի փաթեթավորումն օգտագործում է 100% վերամշակված թղթի նյութ: Այս ամենն օգնում է, որպեսզի արտադրական գործընթացը և վաճառքից հետո շրջանառվող սմարթֆոնները հնարավորինս քիչ աղտոտեն բնությունն ու շրջակա միջավայրը։

Samsung-ը նախատեսում է մինչև տարեվերջ  Galaxy AI-ի հնարավորությունները հասցնել ավելի քան 100 միլիոն սմարթֆոնների՝ ազդարարելով զգալի առաջընթաց դեպի համաշխարհային AI ինտեգրում իր սարքերի շարքում: Այս ընդլայնումն ընդգծում է ընկերության հավակնությունները՝ առաջնորդելու շարժական AI տիրույթում և արտացոլում է նրա ռազմավարությունը՝ բարելավելու օգտատերերի փորձը AI տեխնոլոգիաների միջոցով:

Apple-ի դեպքում սմարթֆոնների համաշխարհային շուկայում կա մոտավորապես 1,4 միլիարդից ավելի iPhone-ի օգտատեր: Սա 2023 թվականին ամբողջ աշխարհում սմարթֆոն օգտագործողների մոտավորապես 18%-ն է:

iPhone 16 սերիայի և iOS 18-ի (օպերացիոն համակարգ) առաջիկա թողարկումով Apple-ը պատրաստվում է ներկայացնել մի շարք AI գործառույթներ, որոնք կարող են զգալիորեն բարձրացնել նախորդ թողարկմամբ (iPhone 15) արտադրված սմարթֆոնների օգտատերերի փոխազդեցությունն ու արդյունավետությունը:

Ըստ Բլումբերգի,  նոր թողարկվող iPhone-ում iOS 18-ը ներկայացնելու է ավելի բարդ փոխազդեցություն Siri-ի և Messages հավելվածի միջև՝ հնարավորություն տալով Siri-ին ավելի արդյունավետ կերպով կարգավորել բարդ հարցումները և ավտոմատ լրացնել նախադասությունները: Սա կարող է Siri-ին դարձնել ավելի ակտիվ կիրառվող գործիք և արդյունավետ օգնական հաղորդակցությունների կառավարման հարցում: Պատկերացրեք՝ նա կպատասխանի ձեր նամակներին և դուք ավելի քիչ ժամանակ կծախսեք հաղորդակցության համար։

Apple-ի ուշադրությունը AI-ին տարածվում է արտադրողականության այնպիսի հավելվածների վրա, ինչպիսիք են Pages-ը և Keynote-ը։ Այս առանձնահատկությունը թույլ կտա AI-ի օգնությամբ զարգացնել բովանդակություն ստեղծելու և սահիկներ պատրաստելու գործընթացը, որը դառնալու է ինտուիտիվ՝ հիմնված օգտատիրոջ փորձառության վրա։ Սմարթֆոնը թույլ կտա նաև ավտոմատ կերպով ստեղծվող Apple Music երգացանկեր, որոնք կօգտագործեն AI-ն՝ անհատականացված երաժշտության ընտրանքները ստեղծելու համար՝ հիմնված օգտատերերի նախասիրությունների և լսումների պատմության վրա:

iPhone սմարթֆոնների նոր թողարկումները նույնպես գերհագեցած են պատկերի, գործընթացների կառավարման, գրաֆիկայի ապահովման տեխնոլոգիաներով, որոնք թույլ են տալիս բեռնել և խաղալ խաղեր՝ AI բաղադրիչով, որտեղ խաղի սցենարը կարող է գեներացվել հընթացս՝ ելնելով օգտատիրոջ փորձառությունից։ Ընդ որում, այս զարգացումը նկատելի է ոչ միայն Samsung և iPhone մեգահսկաների մրցավազքում, այլ առհասարակ՝ տեխնոլոգիաներ արտադրողների մոտ։ Այն ձևավորվում է լայն առաջարկից, որն առկա է շուկայում և ունի զարգացման հսկայական միտում։

Պետք է նշել, որ տեսախցիկի հնարավորությունները AI-ի միջոցով զարգացնելու ջանքերը արդարացիորեն  ինտեգրված են նաեւ  iPhone սմարթֆոններում և դրանք նույնպես մեծ լուծաչափով և մոտեցնելու հնարավորությամբ կարողանում են լուսանկարել լուսինը։ Տեխնոլոգիական մոտեցումը նույնն է, ինչ Samsung-ի պարագայում։

Անդրադառնալով բնապահպանական բաղադրիչին՝ հարկ է նշել, որ Apple-ն առաջ է շարժվում դեպի իր 2030 նպատակը՝ բոլոր ապրանքները ածխածնային չեզոք (carbon neutrality / ածխածնային ազեդեցության բացառումը բնության վրա) դարձնելու համար: Արդեն ածխածնային չեզոք լինելով իր գլոբալ կորպորատիվ գործունեության մեջ՝ Apple-ը 2015 թվականից ի վեր կրճատել է իր ընդհանուր ածխածնի հետքը ավելի քան 45%-ով: Ընկկերության  բնապահպանական ռազմավարությունը ներառում է վերականգնվող էներգիայի ընդլայնումն իր մատակարարման շղթայում և վերամշակված նյութերի օգտագործումը։

Apple-ի զգալի ներդրումները AI-ում՝տարեկան 1 միլիարդ դոլար, ընդգծում են ընկերության հանձնառությունը զարգացնելու AI տեխնոլոգիան: Այս ներդրումն ուղղված է դաշտի հետազոտությանն ու զարգացմանը՝ նպատակ ունենալով AI-ի բաղադրիչները խորապես ինտեգրել Apple-ի բոլոր արտադրանքներում:

Մեգահսկաների մրցավազքը տեսանելի է BankMyCell տեխնոլոգիական ընկերության գծապատկերում, որտեղ ըստ եռամսյակների արտացոլված է վերջին երեք տարիներին համաշխարհային շուկայում զգալի տեղ զբաղեցրած iPhone և Samsung սմարթֆոնների արտադրանքի կիրառումը։

Տեխնոլոգիաները գնալով զարգանում են, դրանց ինտեգրումը մեր կյանք մեծանում է, իսկ մեզ մնում է միայն հետևել այս զարգացումներին և դառնալ դրանց մի մասը՝ կիրառելով գիտության այն հնարավորությունները, որոնք ուղղված են մեր կյանքը բարելավելուն։