«Գիտությունը կրթության սպասավորը չէ»․ ԳԱԱ ինստիտուտներում տարակուսած են բուհերին միավորվելու առթիվ. ՏԵՍԱՆՅՈՒԹ

Գիտությունների ազգային ակադեմիայի համակարգում գործող 2 տասնյակից ավելի գիտական կառույցներ ու կազմակերպություններ հայտնվել են Ակադեմիական քաղաքի նախագծի շրջանաում 6 ուղղություններով ձևավորված աշխատանքային խմբերի նախնական կազմում։ Գիտական համայնքից հնչում են թե՛ կոշտ քննադատություններ, թե՛ պարզապես առաջարկներ՝ միավորման գործընթացը հնարավորինս սահուն իրականացնելու համար։

ՀՀ ԳԱԱ Ֆիզիկայի կիրառական պրոբլեմների ինստիտուտի Նանո և մեզոհամակարգերի ֆիզիկայի լաբորատորիայի վարիչ Հայկ Սարգսյանն այն համոզման է, որ ԳԱԱ ինստիտուտների՝ բուհերի հետ միավորման ադապտացիոն շրջանը կարող է բարդ լինել։

«Մեկը մի համակարգ է, մյուսը՝ այլ։ Բայց գտնել ճիշտ կամուրջներ և փորձել ներգրավել ուսանողներին հետազոտական աշխատանքներում, արդիական է և կարևոր։ Վերցնել ակադեմիայի՝ հանգիստ ռիթմով մարդկանց, որոնք սովոր են աշխատել լաբորատոր լռության մեջ, և տանել մի տեղ, որտեղ առավոտից երեկո երիտասարդների ակտիվ շարժ է, կարող է խանգարել աշխատանքին»,- ասում է նա։

«Դասական» ուղղության մեջ ներկայացված ԳԱԱ համակարգում գործող 8 գիտական ինստիտուտներից մեկն էլ Հ.Աճառյանի անվան լեզվի ինստիտուտն է։ Այն աշխարհում ամենամեծ գիտական հաստատությունն է, որտեղ համակողմանիորեն ուսումնասիրվում է հայոց լեզուն։

«Ինչո՞ւ պետք է Լեզվի ինստիտուտը գործի որևէ բուհի կազմում, որևէ իմաստ չկա։ Ի՞նչ է դա տալու ինստիտուտին՝ բացի վնասից։ Ինստիտուտը կկորցնի իր ինքնուրույնությունը, կդադարի գոյություն ունենալ որպես առանձին գիտական կառույց»,- ասում է Հ. Աճառյանի անվան լեզվի ինստիտուտի տնօրեն Վիկտոր Կատվալյանը։

Ակադեմիական քաղաքի հայեցակարգով նախատեսվում է 6 կլաստեր՝ դասական, բժշկական, տեխնոլոգիական, կրթական, արվեստների և սպայական: Սպայական կլաստերի կառուցվածքի և բովանդակության վերաբերյալ քննարկումները հանրային ձևաչափով չեն նախատեսվում՝ հաշվի առնելով ոլորտին առնչվող առանձնահատկությունները:

Ակադեմիական քաղաքի շրջանակում խոշորացվելիք կլաստերներից 4-ի ձևավորումը նախատեսվում է մինչև 2030 թվականը։

Մանրամասները՝ տեսանյութում։

Աննա Բաբաջանյան