13.01.2026 | 16:31
Վինուս Ուիլյամսի մրցախաղում գրանցվել է տարիքային ռեկորդ. ՏԵՍԱՆՅՈՒԹ
Ռուբիոն հայտարարել է, որ ԱՄՆ-ը մնում է ՆԱՏՕ-ում
Քաղաքականություն
03.04.2025 | 15:54
ԱՄՆ պետքարտուղար Մարկո Ռուբիոն հերքել է ՆԱՏՕ-ն լքելու մասին լուրերը՝ կազմակերպությունում Ամերիկայի ապագայի հետ կապված հրապարակումները «հիստերիա» անվանելով։ Նա ասել է, թե նախագահ Դոնալդ Թրամփը հստակ հասկացրել է՝ ԱՄՆ-ը կմնա պաշտպանական դաշինքում, գրում է Newsweek-ը։
«Միացյալ Նահանգները ՆԱՏՕ-ում է։ Քանի որ մենք խոսում ենք հենց հիմա, Միացյալ Նահանգները նույնքան ակտիվ է ՆԱՏՕ-ում, որքան երբևէ եղել է»,- Բրյուսելում ՆԱՏՕ-ի արտգործնախարարների հանդիպման ժամանակ լրագրողներին ասել է Ռուբիոն:
«Եվ ՆԱՏՕ-ի վերաբերյալ այս հիստերիայի ու ենթադրությունների մի մասը, որը ես տեսնում եմ գլոբալ լրատվամիջոցներում և Միացյալ Նահանգների որոշ ներքին լրատվամիջոցներում, անհիմն է։ Նախագահ Թրամփը հստակ ասել է, որ աջակցում է ՆԱՏՕ-ին: Մենք մնալու ենք ՆԱՏՕ-ում: Նա հստակ ասել է»,- հավելել է Ռուբիոն։
Ռուբիոն նաև նշել է, որ հույս ունի ՆԱՏՕ-ի հանդիպումից հեռանալ բոլոր դաշնակիցների կողմից ՀՆԱ-ի 5 տոկոսը պաշտպանության վրա ծախսելու պարտավորությամբ՝ դաշինքն «ավելի ուժեղ» և «առավել տոկուն» դարձնելու համար, նույնիսկ եթե դա նշանակում է զիջումներ կատարել Եվրոպայում սոցիալական ծրագրերի վրա: Ըստ նրա՝ դա կնշանակի, որ ԱՄՆ-ը կավելացնի իր պաշտպանական ծախսերը։
«Միակ ճանապարհը, որով ՆԱՏՕ-ն կարող է դառնալ ավելի ուժեղ և ավելի կենսունակ, եթե մեր գործընկերները, ազգային պետությունները, որոնք կազմում են այս կարևոր դաշինքը, ունենան ավելի մեծ հնարավորություններ։ Եթե սպառնալիքներն իսկապես այնքան սարսափելի են, որքան ես կարծում եմ, և ինչպես հավատում են այս դաշինքի անդամները, ապա այդ սպառնալիքին պետք է դիմակայել լիակատար և իրական պարտավորությամբ, որպեսզի կարողանանք դիմակայել դրանց»,- ընդգծել է ամերիկացի պաշտոոնյան։
Թարգմանությունը՝ Էմմա Չոբանյանի
