Հասարակություն
27.01.2024 | 16:42
Երևանի հասարակական տրանսպորտը, եղանակային հանգամանքներով պայմանավորված, որոշակի ուշացումներով է մոտենում կանգառներին, բայց երթուղի դուրս չեկած ավտոբուսներ չկան։ Այս մասին Factor.am-ի հետ զրույցում ասաց Երևանի քաղաքապետարանի մամուլի խոսնակ Հայկ Կոստանյանը՝ անդրադառնալով այն տեղեկություններին, թե փողոցներում ձնամաքրման աշխատանքների վատ կազմակերպման պատճառով հասարակական տրանսպորտը բնականոն չի գործում։
Հայկ Կոստանյանը հայտնեց, որ միայն դժվարանցանելի է Ուլնեցի փողոցի մի հատվածը, որտեղ մաքրման աշխատանքներ են իրականացվում։
Երևանի ավագանու ընդդիմադիր անդամ Գրիգոր Երիցյանը Ֆեյսբուքում գրել է, որ ձնամաքրման աշխատանքների ոչ պատշաճ կազմակերպման հետևանքով ամբողջ քաղաքում վթարներ են, այդ թվում՝ համայնքի հաշվեկշռում հաշվառված տրանսպորտային միջոցների մասնակցությամբ:
«Կոմիտասի վրա մեքենաներ են բախվել Երևանի 1-03 շտապօգնության մեքենային, 6 մարդ մարմնական վնասվածքներով տեղափոխվել են Երևանի տարբեր հիվանդանոցներ:
Նոր Նորքում վթարի է ենթարկվել համայնքի ձեռք բերած նոր MAN մակնիշի ավտոբուսը»,- գրել է ավագանու անդամը։
Նարեկ Կիրակոսյան
Լուսանկարը՝ Գրիգոր Երիցյանի ֆեյսբուքյան էջից
