Հասարակություն
23.01.2024 | 20:5532-ամյա վիրավոր հղի կնոջը դուրս են բերում ռուսական ավիահարվածից ավերված Մարիուպոլի ծննդատան փլատակներից․ երեխան մահացած է ծնվում, կես ժամ անց մահանում է նաև մայրը։ Ողբերգական այս պատմությունը վավերագրել է ուկրաինացի լուսանկարիչ Եվգենի Մալոլետկան, որի լուսանկարը ճանաչվել է «World Press Photo 2023» մրցույթի տարվա լուսանկար անվանակարգի հաղթող։
«World Press Photo» ցուցահանդեսը Հայաստանում իրականություն է Նիդերլանդների Թագավորության դեսպանատան ջանքերով։ Ֆոտոմրցույթն արդեն շուրջ 6 տասնամյակի պատմություն ունի։ Նպատակն է` ամբողջ աշխարհին ցույց տալ պատերազմի և խաղաղության գինը, մարդկային ցավն ու տառապանքը։
Մրցույթին մասնակցել է ավելի քան 127 երկրի 4,000 լուսանկարիչ, ներկայացվել է 60,000 հազար լուսանկար, ընտրվել է 24 հաղթող տարբեր անվանակարգերում։
Հայաստանում ցուցահանդեսն արդեն երրորդ տարին է անցկացվում։ ՀՀ-ում Նիդերլանդների Թագավորության փոխդեսպան Տիմեն Կաուվենարի խոսքով՝ այս լուսանկարներով նաև արտահայտվում են խոսքի ազատությունն ու անաչառությունը։
Լուսանկարները ցուցադրված են Ճարտարապետության ազգային թանգարան-ինստիտուտում։ Տնօրեն Մարկ Գրիգորյանը շեշտում է՝ այսօր մենք ունենք աշխարհի լավագույն լուսանկարները տեսնելու հիանալի հնարավորություն։
Ուկրաինացի լուսանկարիչ Եվգենի Մալոլետկան վավերագրել է նաև 2020 թվականի Արցախյան պատերազմը։ Մատնանշում է մարդկային տառապանքը, որ ամենուր նույնն է։ Նրա խոսքով՝ Մարիուպոլի պաշարման դրվագները բավական ծանր էին, դժվար էր տեսնել մարդկանց մահը և միաժամանակ լուսանկարել։
«World Press Photo» մրցույթի 2023 թվականի հաղթողների շարքում է նաև հայ լուսանկարիչ Անուշ Բաբաջանյանը։ Նա հաղթել է «Երկարաժամկետ նախագիծ» անվանակարգում՝ Կենտրոնական Ասիայում ջրի սակավության վերաբերյալ «Battered waters» լուսանկարների նախագծի համար։
Մանրամասները՝ տեսանյութում։
Անի Թամրազյան
