Քաղաքականություն
18.01.2024 | 23:18
Բաքվում Մեծ Բրիտանիայի դեսպան Ֆերգյուս Օլդը երկրում կալանավորված ընդդիմադիրների և լրագրողների հարցով պաշտոնապես դիմել է Ադրբեջանի իշխանություններին։ Մասնավորապես, X-ում գրառմամբ նա հայտնել է, որ հանդիպել է բանկտարկված ընդդիմադիր գործիչ Թոֆիգ Յագուբլուի դստեր՝ Նիգյար Հազիի հետ։
Դեսպանը գրել է, որ հանդիպմանը քննարկել են Թոֆիգ Յագուբլուի կալանավորումն ու նրա ընտանիքի անհանգստությունները։
«Պաշտոնատար անձանց կոչ եմ անում անկախ հետաքննություն անցկացնել և արագ ավարտին հասցնել նոր կալանավորվածների հետաքննության գործընթացները»,- գրել է դեսպանը։
Յագուբլուն կալանավորվել էր անցյալ տարվա դեկտեմբերի 14-ին խարդախության և փաստաթղթերի ապօրինի պատրաստման մեղադրանքով։ Նա հերքում է մեղադրանքները և դրանք անվանում կեղծ։ Ավելի վաղ Նիգյար Հազիի հետ հանդիպել էին նաև ԱՄՆ-ի, Ֆրանսիայի և Գերմանիայի դեսպաններն ու ԵՄ պատվիրակության ղեկավարը։
Նշենք, որ Ադրբեջանի իշխանությունները շարունակում են բռնաճնշումները ընդդիմադիրների, ակտիվիստների ու լրագրողների նկատմամբ։ Նախօրեին էլ Բաքվում ԵՄ պատվիրակության ղեկավարն է անդրադարձել լրագրողների կալանավորումներին։ ԱՄՆ Պետքարտուղարությունն իր հերթին կրկին կոչ է արել Ադրբեջանի իշխանություններին՝ հարգել մարդու իրավունքներն ու հիմնարար ազատությունները։
Էմմա Չոբանյան
