Քաղաքականություն
17.01.2024 | 13:57
ԱՄՆ-ը հերթական անգամ Ադրբեջանի կառավարությանը կոչ է արել հարգել մարդու իրավունքներն ու հիմնական ազատությունները, այդ թվում՝ խոսքի ազատությունը։ Այս մասին ադրբեջանական Թուրան գործակալության հետ զրույցում հայտարարել է Պետքարտուղարության ներկայացուցիչը՝ մեկնաբանելով Բաքվի կողմից ևս երկու լրագրողի կալանավորումը։
«Ադրբեջանում լրագրողների, քաղաքացիական հասարակության ակտիվիստների և ընդդիմադիր գործիչների վերջին կալանավորումների շարանը խորապես մտահոգիչ է: Ընդամենը մեկ ամսվա ընթացքում ավելի քան մեկ տասնյակ մարդ է ձերբակալվել։ Ինչպես նախագահ Բայդենն է ասել Մամուլի ազատության համաշխարհային օրվա կապակցությամբ՝ «Լրագրությունը հանցագործություն չէ, այն հիմնարար նշանակություն ունի ազատ հասարակության համար»: Մենք շարունակում ենք կոչ անել Ադրբեջանի կառավարությանը՝ հարգել բոլորի մարդու իրավունքները և հիմնարար ազատությունները, ներառյալ՝ նրանց, ովքեր օգտվում են արտահայտվելու ազատությունից»,- ասել է Պետքարտուղարության ներկայացուցիչը։
Նշենք, որ վերջին օրերին Ադրբեջանի իշխանությունները ևս երկու լրագրողի են կալանավորել։ Լրագրող Շահին Ռզաևը, որին դատարանը կալանավորել էր 15 օրով «փոքր խուլիգանության» մեղադրանքով, նախօրեին երեկոյան ազատ է արձակվել։ Բաքվի վերաքննիչ դատարանը 15-օրյա կալանքը փոխարինել է 50 մանաթ տուգանքով։
Abzas Media-ի մեկ այլ լրագրողի՝ Էլնարա Գասիմովայի նկատմամբ էլ դատարանը խափանման միջոց ընտրել կալանքը՝ 2 ամիս 17 օր ժամկետով։
Հիշեցնենք՝ 2023 թվականի նոյեմբերից կալանավորվել են Ադրբեջանի իշխանությունների կառուպցիոն գործերը հետաքննող Abzas Media-ի տնօրեն Ուլվի Հասանլին, փոխտնօրեն Մուհամմեդ Կեկալովը, գլխավոր խմբագիր Սևինջ Վաքըֆքիզին, լրագրող Նարգիզ Աբսալամովան և հետաքննող լրագրող Հաֆիզ Բաբալին(նա Թուրան գործակալության տնտեսական բաժնի խմբագիրն է)։ Կալանավորված են նաև ընդդիմադիր Kanal-13 մի շարք լրագրողներ։
Էմմա Չոբանյան
