Ադրբեջանի իշխանությունները ևս երկու լրագրողի են կալանավորել

Ադրբեջանի իշխանությունները փետրվարի 7-ին նախանշված արտահերթ նախագահական ընտրությունների նախաշեմին շարունակում են լրագրողների կալանավորել։ Ադրբեջանական լրատավամիջոցների հաղորդմամբ՝ կալանավորվել է JAMnews-ի քաղաքական մեկաբան, հայտնի լրագրող Շահին Ռզաևը։

Հարազատները պատմել են, որ նախօրեին նա ժամը 14:00-ի սահմաններում գնացել է տանից ու այլևս կապի դուրս չի եկել։ Ավելի ուշ պարզվել է, որ նա բերման է ենթարկվել ոստիկանության կողմից և դատարանի որոշմամբ 15 օրվա ազատազրկման դատապարտվել՝ «փոքր խուլիգանության» մեղադրանքով։

Հարազատների խոսքով՝ Շահին Ռզաևի ձերբակալության և դատավարության մասին ընտանիքի անդամները տեղեկացված չեն եղել։ Ռզաևը դատարան է ներկայացել պետական փաստաբանի հետ ու հերքել մեղադրանքները։ Նրա հարազատները կարծում են, որ վերջինս պատժվում է լրագրողական գործունեության և Facebook-ում հրապարակումների համար։

Բացի այդ, Բաքվի Խաթայի շրջանային դատարանը քննարկել է Abzas Media-ի մեկ այլ լրագրողի՝ Էլնարա Գասիմովայի նկատմամբ խափանման միջոց ընտրելու վերաբերյալ քննչական մարմնի առաջարկը։ Նիստում որոշվել է Գասիմովայի նկատմամբ խափանման միջոց ընտրել կալանքը՝ 2 ամիս 17 օր ժամկետով։

Նրա փաստաբան Բարուզ Բայրամովն ուշադրություն է հրավիրել լրագրողի նկատմամբ անմարդկային վերաբերմունքի ուղղությամբ, թե ինչպես է նա դատարան բերվել՝ ձեռքերը մեջքի հետևում կապված։

Գասիմովան քրեական պատասխանատվության է ենթարկվել Abzas Media-ի գործով։ Նրան մեղադրանք է առաջադրվել Քրեական օրենսգրքի 206.3.2 հոդվածի հատկանիշներով (մաքսանենգությունը, որը կատարվել է մի խումբ անձանց կողմից նախնական համաձայնությամբ), ինչպես և մյուս լրագրողները տվյալ լրատվամիջոցի։ Գասիմովան հերքում  է մեղադրանքները։ Նա հայտարարել է, որ իր ձերբակալությունը պայմանավորված է նրանով, որ Abzas Media-ի իր գործընկերների կալանավորումից հետո շարունակել է լրագրողական աշխատանքը։

Վերջին շրջանում Ադրբեջանում 10-ից ավելի լրագրող է կալանավորվել։ Գասիմովան Abzas Media-ի կալնավորված արդեն վեցերորդ աշխատակիցն է։

Հիշեցնենք, որ 2023 թվականի նոյեմբերից կալանավորվել են Ադրբեջանի իշխանությունների կառուպցիոն գործերը հետաքննող Abzas Media-ի տնօրեն Ուլվի Հասանլին, փոխտնօրեն Մուհամմեդ Կեկալովը, գլխավոր խմբագիր Սևինջ Վաքըֆքիզին, լրագրող Նարգիզ Աբսալամովան և հետաքննող լրագրող Հաֆիզ Բաբալին(նա Թուրան  գործակալության տնտեսական բաժնի խմբագիրն է)։ Կալանավորված են նաև ընդդիմադիր Kanal-13 մի շարք լրագրողներ։

Էմմա Չոբանյան