Ադրբեջանում հերթական լրագրողն է կալանավորվել

Բաքվում կալանավորվել է ընդդիմադիր Kanal-13-ի լրագրող Շամո Էմինովը։ Դատարանը նրան երեք ամսով կալանավորելու որոշում է կայացրել մաքսանենգության մեղադրանքով, գրում են ադրբեջանական լրատվամիջոցները։

Կինը՝ Դուրդանա Էմինովան ասել է, որ նա ձերբակալվել է դեռևս դեկտեմբերի 22-ին, ինչից հետո իրենց տանը խուզարկություն է իրականացվել։

«Դեկտեմբերի 22-ի առավոտյան Շամոն տնից դուրս եկավ հարցազրույցի գնալու։ Ավելի ուշ ես դուրս եկա տնից և գնացի աղջկաս մոտ։ Երեկոյան ոստիկանությունից զանգ ստացա, որ ամուսինս իրենց մոտ է, խնդրեցին, որ բերեմ նրա դիպլոմը։ Երբ վերադարձա տուն՝ դիպլոմի համար, տեսա, որ բնակարանում ամեն ինչ ցրված է, ամուսնուս համակարգիչը չկա։ Պարզվում է՝ խուզարկություն է կատարվել»,- պատմել է Էմինովան։

Նա նշել է, որ հինգ օրվա ընթացքում ինքը չի կարողացել պարզել՝ ամուսնու հետ ինչ է կատարվել։ Միայն դեկտեմբերի 26-ին Էմինովը զանգահարել է տուն ու հայտնել, որ իրեն մեղադրում են մաքսանենգության մեջ, և դատարանն իր նկատմամբ խափանման միջոց է ընտրել կալանքը՝ 3 ամիս 5 օր ժամկետով։ Կինը վստահեցնում է, որ ամուսինը ոչնչում մեղավոր չէ։

Հավելենք, որ նոյեմբերի 28-ին երեք ամսով կալանավորվել է ընդդիմադիր Kanal 13-ի ղեկավար Ազիզ Օրուջևը՝ «ապօրինի շինարարության համար», նրան սպառնում է երեք տարվա ազատազրկում։ Դեկտեմբերի 19-ին Ազիզ Օրուջևին լրացուցիչ մեղադրանք է առաջադրվել՝ Ադրբեջանի ՔՕ 206.3.2 հոդվածով (մաքսանենգություն):

Դեկտեմբերի 2-ին էլ դատարանը 30-օրյա կալանք է սահմանել Kanal-13-ի հաղորդավար Ռուֆաթ Մուրադլիի նկատմամբ։

Ավելի վաղ Բաքվի դատարանը չորս ամսով կալանավորել էր նաև Ադրբեջանի իշխանությունների կոռուպցիոն գործունեությունը հետաքննող AbzasMedia-ի տնօրեն Ուլվի Հասանլիին, գլխավոր խմբագիր Սևինջ Վաքըֆքըզիին, աշխատակից Մոհամմեդ Կեկալովին։ Նրանք մեղադրվում են փողերի  լվացման մեջ։ Դեկտեմբերի 1-ին Բաքվի Խաթայի դատարանը AbzasMedia-ի մեկ այլ լրագրողի՝ Նարգիզ Աբսալամովին երեք ամսով կալանավորելու որոշում էր կայացրել։

Օրերս էլ ձերբակալվել է Kanal 11 առցանց հեռուստաընկերության ղեկավար Թեյմուր Քերիմովը։ Դեկտեմբերի 12-ին Բաքվի Նարիմանովի շրջանային դատարանը Քերիմովի նկատմամբ խափանման միջոց էր ընտրել 4-ամսյա կալանքը։ Նրան մեղադրում են շորթման մեջ։

Կալանավորվել է նաև «Թուրան» գործակալության տնտեսական բաժնի խմբագիր Հաֆիզ Բաբալին։

Էմմա Չոբանյան