Պատերազմի սկիզբը շատ ավելի կանխատեսելի է, քան ավարտը. ապաքաղաքական զրույց Արմեն Պետրոսյանի հետ. ՏԵՍԱՆՅՈՒԹ

Factor TV-ի A-politic հաղորդաշարի հյուրն է արևելագետ Արմեն Պետրոսյանը: Նրա կարծիքով՝ այսօր համաշխարհային նոր պատերազմի մասին կարելի է խոսել միայն մեծ վերապահումներով. նման պատերազմը, ըստ նրա, ենթադրում է խոշոր տերությունների ուղիղ ռազմական բախում:

Այսօր ընթացող կոնֆլիկտների կարգավորումը կարող է տեղի ունենալ նոր աշխարհակարգի ստեղծման շրջանակում, երբ ՄԱԿ-ը կամ այդ կառույցին փոխարինած մեկ այլ կազմակերպություն կմշակի բոլորի համար պարտադիր և ընդունելի կանոններ: Կախված նրանից, թե ինչպես կավարտվի, մասնավորապես, ռուս-ուկրաինական հակամարտությունը, հնարավոր է, որ ՄԱԿ-ի Անվտանգության խորհուրդը կհամալրվի նոր անդամներով: Հաղորդման հյուրը վստահ է, որ նոր աշխարհակարգի մեխանիզմներ վաղ թե ուշ կստեղծվեն և կապահովեն հարաբերական խաղաղության որոշակի ժամանակաշրջան:

Պատերազմը սկսող կողմը մի դեպքում ճիշտ է հաշվարկում իր քայլեըը, իսկ այլ դեպքերում սխալվում է իր հաշվարկներում: Այդ պարագայում նրա գործողությունները կարելի է անվանել արկածախնդրություն: Հաշվարկների մեջ, արևելագետի կարծիքով, մտնում են ոչ միայն զուտ ռազմական ներուժի գնահատումը, այլև նոր դաշնակիցների ձեռքբերումը, ինչպես նաև հակառակորդի դաշնակցային հարաբերությունների խաթարումը: Առաջնային դեր է խաղում նաև սեփական հասարակությանը պատերազմին նախապատրաստելը:

Արմեն Պետրոսյանը թերահավատորեն է վերաբերվում այն հեռանկարին, որ մեր տարածաշրջանում տեսանելի ապագայում հնարավոր կլինի խուսափել նոր պատերազմից:

Մանրամասները՝ տեսանյութում:

Արամ Աբրահամյան