29.04.2026 | 10:12
Հայտնի է Արման Ծառուկյանի հաջորդ մրցակիցը RAF-ում
Չնայած տարաձայնություններին՝ Հ1-ը կհեռարձակի Սուրբծննդյան պատարագը
Քաղաքականություն
05.01.2024 | 14:47
Չնայած Մայր Աթոռի և Հանրային հեռուստաընկերության միջև սկսված հեռակա բանավեճին՝ Առաջին ալիքը վաղը կհեռարձակի Գարեգին Բ-ի ձեռամբ մատուցվող Սուրբծնննդյան պատարագը։ Factor.am-ի հարցին ի պատասխան՝ տեղեկացրեցին և՛ Առաջին ալիքի հանրային կապերի բաժնից, և՛ Մայր Աթոռի տեղեկատվական կենտրոնից։ Պատարագը սկսվելու է ժամը 10։30-ին։
Հիշեցնենք՝ տարեմուտին Առաջին ալիքի և Մայր Աթոռի միջև աննախադեպ բանավեճ էր սկսվել՝ Ամենայն Հայոց Կաթողիկոս Գարեգին Բ-ի ամանորյա ուղերձը չհեռարձակելու շուրջ։
Նախ Մայր Աթոռը տեղեկացրեց, որ Առաջին ալիքը հրաժարվել է Կաթողիկոսի ամենամյա ուղերձը հեռարձակել ավանդաբար նախատեսված ժամին՝ երկրի ղեկավարի ուղերձից առաջ՝ առաջարկելով այն ցուցադրել լրատվական թողարկման ընթացքում, ինչը Մայր Աթոռն անընդունելի էր համարել։
Ավելի ուշ, Հանրային հեռարձակողի խորհուրդը հաստատեց տեղեկությունը, որ հրաժարվել է ուղերձը հեռարձակել նախորդ տարիների ժամին՝ հիմանվորելով, որ չկա օրենսդրական կարգավորում, և հեռուստաընկերություններն իրենք են որոշում՝ երբ հեռարձակել այն։
Միաժամանակ, խորհուրդն ափսոսանք էր հայտնել ստեղծված իրավիճակի համար և հույս հայտնել, որ Մայր Աթոռի հետ համագործակցությունը կշարունակվի։
Նշենք, որ այս միջադեպը տեղի է ունենում Գարեգին Բ-Նիկոլ Փաշինյան անթաքույց տարաձայնությունների ֆոնին։ Կաթողիկոսը 44-օրյա պատերազմից հետո ընդդիմադիրների հետ միասին պահանջում է վարչապետի հրաժարականը։
Նարեկ Կիրակոսյան
