Նախիջևանի հետ Հայաստանի տարածքով տրանսպորտային կապը չի ազդի նրա ինքնիշխանության վրա․ Հաջիև

Ադրբեջանի նախագահի օգնական Հիքմեթ Հաջիևը հարցազրույց է տվել գերմանական Berliner Zeitung թերթին և խոսել տարածաշրջանում հաղորդակցությունների բացման մասին։

Նա  պնդել է, թե Նախիջևանը 30 տարի գտնվում է շրջափակման մեջ, ինչն իրականությանը չի համապատասխանում։ Նախիջևանը ունի և  մշտապես ունեցել է ցամաքային անմիջական կապ Իրանի ու Թուրքիայի հետ։ Հաջիևը նաև նշել է, թե Հայաստանի տարածքով Նախիջևանի հետ կապը ենթադրում է մաքսային և սահմանային հսկողության վերացում։

«Հայաստանը, նախաձեռնելով «Խաղաղության խաչմերուկ» նախագիծը, փորձում է շեղվել եռակողմ հայտարարությունից բխող պարտավորություններից և կեղծ կերպով ներկայանալ որպես տարածաշրջանի ապաշրջափակմանը եռանդուն աջակցող կողմ։ Բայց իրականում հենց Հայաստանն է շարունակում խոչընդոտել տարածաշրջանում հաղորդակցությունների բացմանը»,-ասել է Հաջիևը`նշելով, թե Ադրբեջանը մոտ երեք տարի սպասել է, որ Հայաստանը կատարի Նախիջևանի հետ տրանսպորտային հաղորդակցության ապահովման իր պարտավորությունները, և պատրաստ է դիտարկել Կալինինգրադի նման մոդելներ։

«Մենք միաժամանակ աշխատում ենք այլընտրանքային լուծումների վրա։ Մենք նաև ավելացնում ենք Բաքու-Թբիլիսի-Կարս երկաթուղու թողունակությունը մինչև տարեկան 5 մլն տոննա։ Իրանցի մեր գործընկերների հետ մենք կառուցում ենք այլընտրանքային ճանապարհ դեպի Նախիջեւան՝ Իրանի տարածքով։ Այն, որ Երևանն այս դեպքում դուրս է մնալու տարածաշրջանային փոխգործակցության նոր նախագծից, կարելի է բացատրել միայն սեփական քաղաքականությամբ»,-ասել է Ադրբեջանի նախագահի օգնականը`հավելելով.

«Հստակեցնեմ նաև, որ Իրանի տարածքով տրանսպորտային նախագծի իրականացումը չի նշանակում, որ Հայաստանով երթուղին այլևս չի դիտարկվելու։ Մենք պատրաստ ենք աշխատել Հայաստանի հետ այս հարցում։ Միշտ ավելի լավ է ավելի շատ այլընտրանքներ ունենալ: Նախիջևանի հետ Հայաստանի տարածքով տրանսպորտային կապը չի ազդի նրա ինքնիշխանության վրա։ Այս թեմայի շուրջ հիստերիան լրիվ անհիմն է»,- ասել է նա։

Էմմա Չոբանյան