07.10.2026 | 11:02
2027 թ․ հունվարի 1-ից սոցփաթեթի ծրագիրն ավարտվում է․ փոփոխություններ և նոր հնարավորություններ. ՈՒՂԻՂ
ԱՄՆ Պետդեպը կրկին անընդունելի է որակել Ադրբեջանում լրագրողների կալանավորումները
Քաղաքականություն
28.12.2023 | 22:50
ԱՄՆ-ը կրկնում է իր կոչը Ադրբեջանի կառավարությանը՝ հարգել բոլորի իրավունքներն ու ազատությունները, «ներառյալ՝ նրանց, որոնք օգտագործում են խոսքի ազատությունը»: Այս մասին հայտարարել է Պետքարտուղարության ներկայացուցիչը՝ պատասխանելով Ադրբեջանում հերթական լրագրողի՝ Շամո Էմինովի կալանավորման մասին ադրբեջանական «Թուրան» գործակալության հարցին։
«Ադրբեջանում լրագրողների, քաղաքացիական ակտիվիստների և ընդդիմադիր գործիչների ձերբակալությունների վերջին միտումը խորը մտահոգություն է առաջացնում։ Միայն անցյալ ամիս Ադրբեջանում մեկ տասնյակից ավելի նման գործիչներ են ձերբակալվել։ Սա անընդունելի է։ Մենք շարունակում ենք կոչ անել Ադրբեջանի կառավարությանը՝ հարգել բոլորի մարդու իրավունքները և հիմնարար ազատությունները, ներառյալ՝ նրանց, որոնք օգտագործում են խոսքի ազատությունը»,- ասել է Պետքարտուղարության ներկայացուցիչը:
Հիշեցնենք՝ ԱՄՆ Պետքարտուղարության խոսնակ Մեթյու Միլլերն ավելի վաղ ճեպազրույցում անընդունելի էր անվանել Ադրբեջանի իշխանությունների կողմից լրագրողների, ակտիվիստների ու ընդդիմադիրների կալանավորումները։
Ադրբեջանում վերջին ամսում առնվազն 10 լրագրող է կալանավորվել։ Նախօրեին հայտնի դարձավ, որ կալանավորվել է ընդդիմադիր Kanal-13-ի լրագրող Շամո Էմինովը։ Դատարանը նրան երեք ամսով կալանավորելու որոշում է կայացրել մաքսանենգության մեղադրանքով։
Էմմա Չոբանյան
