Անընդունելի է․ԱՄՆ Պետդեպը՝ Ադրբեջանում լրագրողների ու ընդդիմադիրների կալանավորումների մասին

ԱՄՆ-ն անընդունելի է համարում Ադրբեջանի իշխանությունների կողմից լրագրողների, ակտիվիստների ու ընդդիմադիրների կալանավորումները։ Այս մասին ճեպազրույցում հայտարարել է Պետքարտուղարության խոսնակ Մեթյու Միլլերը՝ պատասխանելով Ադրբեջանում արտահերթ նախագահական  ընտրություններից առաջ ընդդիմադիր Թոֆիգ Յագուբլուի ու իշխանության քննադատների ձերբակալություների մասին հարցին։

«Ադրբեջանում լրագրողների, քաղաքացիական հասարակության ակտիվիստների և ընդդիմադիր գործիչների ձերբակալման վերջին միտումը խորապես մտահոգիչ է: Ընդամենը վերջին մեկ ամսվա ընթացքում մեկ տասնյակից ավելի նման գործիչներ են ձերբակալվել։ Դա անընդունելի է, և մենք կշարունակենք Ադրբեջանի կառավարությանը կոչ անել հարգել բոլորի մարդու իրավունքները և հիմնարար ազատությունները, ինչպես նաև կոչ անում արագ ազատ արձակել բոլոր նրանց, ով անարդարացիորեն ձերբակալվել է»,-ասել է Միլլերը։

Բաքվում ԱՄՆ-ի դեսպանատունը ևս կոչ է արել ազատ արձակել Թոֆիգ Յագուբլուին։ «Մենք խորապես մտահոգված ենք Թոֆիգ Յագուբլուի կալանավորմամբ։ Մենք կոչ ենք անում ազատ արձակել Թոֆիկ Յագուբլուին և բոլոր նրանց, որոնք ազատազրկված են հիմնարար ազատությունների իրականացման համար»,-ասվում է դեսպանատան X-ի էջում գրառման մեջ։

Հիշեցնենք, որ վերջին շաբաթներին Ադրբեջանի իշխանությունները բռնաճնշումների նոր ալիք են սկսել ընդդիմադիրների, լրագրողների ու քաղհասարակության ներկայացուցիչների դեմ։ Մեկ ամսից էլ քիչ ժամանակահատվածում 8 լրագրող է կալանավորվել։

Դեկտեմբերի 14-ին էլ իշխանությունները ձերբակալել էին  ընդդիմադիր քաղաքական գործիչ, նախկին քաղբանտարկյալ, «Մուսավաթ» կուսակցության անդամ Թոֆիգ Յագուբլուին։ Դատարանը  Յագուբլուի նկատմամբ խափանման միջոց էր ընտրել կալանավորումը՝ 4 ամիս ժամկետով։