Ադրբեջանում ձերբակալել են Ալիևի քննադատներից՝ ընդդիմադիր գործիչ Թոֆիգ Յագուբլուին

Ադրբեջանում երեկ երեկոյան ձերբակալվել է ընդդիմադիր քաղաքական գործիչ, նախկին քաղբանտարկյալ, «Մուսավաթ» կուսակցության անդամ Թոֆիգ Յագուբլուն։ Տեղական լրատվամիջոցների հաղորդմամբ՝ նրա ձերբակալության մասի սոցցանցերում հայտնել է դուստրը՝ Նիգար Հազին։ Նա պատմել է, որ իրենց բնակարանի խուզարկության ժամանակ կանխիկ գումար է հայտնաբերվել արտարժույթով և ազգային արժույթով, որն իրենց չի պատկանում։

Նիգյար Հազիի խոսքով՝ ոստիկաններն են գումարն իրենց տանը դրել են։ Ուժայիններն առգրավել են հեռախոսներ, համակարգիչներ։

Յուգուբլուի փաստաբան Ագիլ Լաիջը հայտնել է, որ նա որպես կասկածյալ ներգրավվել է Քրեական օրենսգրքի 178.3.2 (խարդախություն՝ խոշոր վնասով), 320.1 (պաշտոնական փաստաթղթերի կեղծում) և 320.2 (գիտակցաբար կեղծված փաստաթղթերի օգտագործում) հոդվածներով հարուցված քրեական գործով։

Յագուբլուն հերքում է հետաքննության մեղադրանքները և իր քրեական հետապնդումը կապում քաղաքական գործունեության հետ։ Այդ հոդվածներով նրան սպառնում է 7-12 տարվա ազատազրկում։

Նշենք, որ Յագուբլուն Ադրբեջանի նախագահ Իլհամ Ալիևի կոշտ քննադատներից է, բազմիցս ձերբակալվել ու ազատազրկման է դատապարտվել, նաև ուժայինների կողմից ծեծի ենթարկվել։

Վերջին անգամ նա ձերբակալվել է 2022 թվականի դեկտեմբերի 23-ին Բաքվի կենտրոնում հասարակական ակտիվիստ Բահտիյար Հաջիևի ազատ արձակման պահանջով բողոքի ցույցի ժամանակ։ Բաքվի Սաբայիլի շրջանային դատարանի որոշմամբ նա 30 օրվա կալանքի էր դատապարտվել։ Ի նշան բողոքի՝ 2023 թվականի հունվարի 5-ին Յագուբլուն հացադուլ էր հայտարարել։ Հունվարի 22-ին 30-օրյա վարչական կալանքից հետո նա ազատ էր արձակվել։

Հավելենք, որ վերջին շաբաթներին Ադրբեջանում արդեն ութ լրագրող և հասարակական ակտիվիստ է կալանավորվել։

Էմմա Չոբանյան