Խորհրդային Հայաստանի օրհներգի հիմքում շարական դնելը խիզախ քայլ էր․ ապաքաղաքական զրույց Արմինե Գրիգորյանի հետ. ՏԵՍԱՆՅՈՒԹ

Factor TV-ի A-politic հաղորդաշարի հյուրն է դաշնակահարուհի, միջազգային մրցույթների դափնեկիր, «Արամ Խաչատրյան» տուն-թանգարանի տնօրեն Արմինե Գրիգորյանը: Նրա կարծիքով՝ հայ մեծ կոմպոզիտորի ստեղծագործական ժառանգության մեջ կան բազմաթիվ էջեր, որոնք դեռևս բացահայտման կարիք ունեն:

Խաչատրյանին աշխարհում և Հայաստանում ճանաչում են բալետներով, Ջութակի, Դաշնամուրային կոնցերտներով, սակայն նրա մյուս կոնցերտները, ինչպես նաև կամերային ստեղծագործությունները լայն հասարակությանը հայտնի չեն:

Կոմպոզիտորի կերպարի մեջ նույնպես կան չբացահայտված գծեր և, հակառակը, դրա վերաբերյալ կան մի շարք առասպելներ: Այդպիսի մի առասպել է, օրինակ, Խաչատրյանի և Սալվադոր Դալիի հանդիպման մասին պատմությունը, որը ծայրից ծայր հնարած է՝ կոմպոզիտորն ընդհանրապես Իսպանիա չի այցելել:

Հաղորդման հյուրը կասկածի տակ է դնում նաև այն պնդումը, թե Խաչատրյանն աթեիստ էր՝ դժվար թե անհավատ մարդը Խորհրդային Հայաստանի օրհներգի հիմքում դներ հայկական շարականը: 1944 թվականին դա բավականին խիզախ քայլ էր:

Տուն-թանգարանի տնօրենն առանձին անդրադարձ է կատարում Խաչատրյանի ստեղծագործական դասարաններին Գնեսինների անվան ինստիտուտում և Մոսկվայի կոնսերվատորիում: Վառ անհատականություն լինելով՝ Խաչատրյանը բացարձակապես չէր ճնշում իր ուսանողներներին, չէր պարտադրում իր կամքը, ճաշակը: Դա է պատճառը, որ նրա սաների մեծ մասը դարձել են հայտնի կոմպոզիտորները՝ ամեն մեկն իր ուրույն ձեռագրով:

Մանրամասները՝ տեսանյութում:

Արամ Աբրահամյան