17.02.2026 | 01:59
Կարինա Ակոպովան ու Նիկիտա Ռախմանինը 14-րդ տեղը գրավեցին ձմեռային Օլիմպիական խաղերում
Ավինյանի՝ «մի հատ լայվն անջատեք» ցուցումն օրենքի խախտում է
Քաղաքականություն
21.11.2023 | 23:53
Երևանի քաղաքապետ Տիգրան Ավինյանը նոյեմբերի 21-ին Երևանի ավագանու նիստի ուղիղ հեռարձակումը դադարեցրել է օրենքի խախտմամբ։ Այս մասին Factor.am-ի հարցին ի պատասխան ասաց Ժուռնալիստների «Ասպարեզ» ակումբի խորհրդի նախագահ, Գյումրու ավագանու նախկին անդամ Լևոն Բարսեղյանը։
Հիշեցնենք՝ նոյեմբերի 21-ի հերթական նիստի ժամանակ ավագանու «Հանրապետություն» խմբակցության ղեկավար Անի Խաչատրյանի և «Մայր Հայաստան» խմբակցության անդամների միջև վիճաբանություն տեղի ունեցավ։ «Մայր Հայաստանից» Սոնա Աղեկյանը բաժակով ջուրը լցրեց Անի Խաչատրյանի ուղղությամբ, նա էլ քաշեց Աղեկյանի մազերը։ Մինչ այդ Խաչատրյանի կողմից հնչել էր քննադատական ելույթ՝ Անդրանիկ Թևանյանին ուղղված, և փոխադարձ վիրավորանքներ։
«Մի հատ լայվն անջատեք, մի հատ լայվն անջատեք»,-ավագանու նիստի ընթացքում կարգադրեց Տիգրան Ավինյանը՝ առանց հայտարարելու, որ նիստն ընդհատվում է։
«Առանց նիստը փակելու կամ ընդմիջում հայտարարելու նիստի ուղիղ հեռարձակման դադարեցումը օրենքի այդ դրույթի խախտում է»,-Factor.am-ի հետ զրույցում ասաց Լևոն Բարսեղյանը։
Նշենք, որ Տեղական ինքնակառավարման մասին ՀՀ օրենքի 16-րդ հոդվածի 9-րդ կետի համաձայն ավագանու հրապարակային նիստերը առցանց հեռարձակվում են համայնքի պաշտոնական համացանցային կայքում՝ անկախ բնակչության թվից։ Այս կարգավորումն ուժի մեջ է մտնել 2022 թվականի հունվարի 1-ից։
Նույն օրենքի նույն հոդվածի 8-րդ կետում էլ նշված է, որ ավագանու նիստերը հրապարակային են։ Այսինքն՝ քանի դեռ նիստը չի ընդմիջվել և ավարտվել, դահլիճում տեղի ունեցողը պետք է հասանելի լինի ՀՀ քաղաքացիներին։
Հայաստանը ժողովրդավարության բաստիոն հայտարարած Փաշինյանի թիմակիցների մոտ այս գործելաոճը կարծես սովորույթ է դառնում։ 2021 թվականի օգոստոսի 11-ին էլ Ալեն Սիմոնյանն էր ԱԺ նիստի ուղիղ հեռարձակումն անջատելու կարգադրություն տվել, երբ նիստը չէր ավարտվել և չէր ընդմիջվել։
Հիշեցնենք, որ այդ ժամանակ էլ ԱԺ նիստը ծեծկռտուքի էր վերածվել՝ իշխանության և ընդդիմության պատգամավորների միջև, որին միջամտել էին ՊՊԾ ծառայողները։
Ի դեպ,Պետաիրավական հարցերի մշտական հանձնաժողովի նախագահ, ՔՊ-ական պատգամավոր Վլադիմիր Վարդանյանն էլ այդ օրը Factor.am-ի հարցին ի պատասխան հայտարարել էր, թե ԱԺ-ի ծեծկռտուքը լուսաբանման համար չէ։
Նարեկ Կիրակոսյան
