Մարդկանց մեծամասնության համար հարմարավետությունն ավելի կարևոր է, քան անվտանգությունը. ապաքաղաքական զրույց Վաչե Գաբրիելյանի հետ. ՏԵՍԱՆՅՈՒԹ

Factor TV-ի A-politic հաղորդաշարի հյուրն է Հայաստանում ամերիկյան համալսարանի Բիզնեսի և տնտեսագիտության քոլեջի դեկան Վաչե Գաբրիելյանը: Նրա կարծիքով՝ վերջին տասնամյակներում հաղորդակցության տեխնոլոգիաների և լոգիստիկայի զարգացումը փոխել է սպառողի վարքը: Նա կարող է փնտրել իր նախընտրած ապրանքն աշխարհով մեկ և անհատական պահանջներ ներկայացնել արտադրողին: Զանգվածային սպառումն անհատականով փոխարինելը փոխում է նաև մարքեթինգի տրամաբանությունը: Արտադրողը պետք է ոչ միայն գտնի իր սպառողին, այլև «փայփայի» նրան՝ բավարարելով վերջինիս ճաշակի զանազան պահանջները:

Նման իրավիճակում առաջանում են բազմաթիվ խնդիրներ, այդ թվում՝ անձնական տվյալների պաշտպանության հարցը: Ըստ տնտեսագետի՝ շատերը պատրաստ են ընկերություններին տրամադրել իրենց տվյալները, այդ թվում՝ բանկային, որպեսզի ստանան իրենց ուզած ծառայությունները: Այդպիսով, մարդիկ հարմարավետությունը գերադասում են անվտանգությունից:

Մեկ այլ խնդիր է հեռավար աշխատելը, «ֆրիլանսերությունը»: Հաղորդման հյուրի համոզմամբ՝ դա երբեմն կարող է առաջացնել սոցիալական պաշտպանվածության հարց, բայց առավել կարևոր է, որ «ֆրիլանսերն» աշխատանքային առաջխաղացման ավելի քիչ շանսեր ունի: Բացի այդ, ոչ բոլորը բնակարանային պայմաններ ունեն՝ տանն աշխատելու համար:

Մեկ այլ հետևանք են աշխատաշուկայի չափազանց դինամիկ փոփոխությունները․ եթե առաջ միևնույն տեղում մի քանի տասնամյակ աշխատելը համարվում են «որակի նշան», ապա այժմ բուհի շրջանավարտը դա կհամարի անեծք:

Մանրամասները՝ տեսանյութում:

Արամ Աբրահամյան