Հաղորդաշարեր
08.10.2023 | 21:02Factor TV-ի A-politic հաղորդաշարի հյուրն է ռեժիսոր, Հայաստանի թատերական գործիչների միության նախագահ Հակոբ Ղազանչյանը: Նրա կարծիքով՝ անկախ այն աղետալի իրադարձություններից, որոնք տեղի են ունեցել վերջին ժամանակներս, թատերական կյանքը Հայաստանում պետք է շարունակվի: Հատկապես անհրաժեշտ է ուշադիր լինել երեխաների նկատմամբ՝ նրանց պետք է ուրախություն, տոն պարգևել:
«Երեխաներին չի կարելի սգի մեջ մեծացնել»,- ասում է ռեժիսորը:
Նա հիշեցնում է, որ Հակոբ Պարոնյանի անվան երաժշտական կոմեդիայի թատրոնը բացվել է 1942 թվականին, երբ գերմանական զորքը Հյուսիսային Կովկասում էր, և մարդիկ ամեն օր «սև թուղթ» էին ստանում:
Հակոբ Ղազանչյանը հիշում է՝ առաջին ներկայացումը, որը նա բեմադրել է Գյումրիի դրամատիկական թատրոնում 1988 երկրաշարժից հետո, Շեքսպիրի կատակերգությունն էր:
Պե՞տք է, արդյոք, թատրոնն անդրադառնա վերջին պատերազմական գործողություններին: Պատասխանելով այս հարցին՝ հաղորդման հյուրը կարծիք է հայտնում, որ անմիջականորեն այդ թեմային անդրադառնալը դեռևս վաղ է, ժամանակ է պետք՝ կատարվածն իմաստավորելու համար: Բայց կարող են լինել ներկայացումներ, թեկուզ դասական պիեսների վրա հիմնված, որտեղ առանց որևէ բառ փոխելու, «հնչի» պատերազմի և բոլոր վերջին ողբերգական իրադարձությունների թեման: Այդ առումով կինոն հիմնովին տարբերվում է թատրոնից, որտեղ գործողությունը ծավալվում է պայմանական, ոչ թե իրական ժամանակում: Այդ է, ի դեպ, պատճառը, որ, ըստ ռեժիսորի, թատերական ներկայացումները շատ ավելի արագ են «մաշվում», քան կինոարվեստի լավագույն նմուշները:
Մանրամասները՝ տեսանյութում:
Արամ Աբրահամյան
