15.09.2026 | 17:56
Ըստ ՔԿ-ի՝ Տաթևի վարչական ղեկավար Գոռ Մինասյանը անասնապահին տարիներ շարունակ հարկադրել է անվճար աշխատել
Մինչև 2030 թվականը Ուկրաինան կարող է ԵՄ անդամ դառնալ. Շառլ Միշել
Քաղաքականություն
04.10.2023 | 21:48
Ուկրաինան կարող է Եվրամիության անդամ դառնալ մինչև 2030 թվականը։ Այս մասին գերմանական Der Spiegel-ին տված հարցազրույցում ասել է Եվրոպական խորհրդի նախագահ Շառլ Միշելը, փոխանցում է DW-ի ռուսական ծառայությունը։
«Ուկրաինան և անդամակցության մյուս թեկնածուները պետք է բարեփոխումներ իրականացնեն, պայքարեն կոռուպցիայի դեմ և կատարեն իրավական նախադրյալները»,- պարզաբանել է նա։
ԵՄ անդամ երկրները «պետք է հստակ իմանան, թե ինչի են ուզում հասնել միասին, որտեղ են իրենց առաջնահերթությունները և ինչի վրա են ցանկանում գումար ծախսել», ասել է Միշելը։ Միևնույն ժամանակ, Եվրամիությունը պետք է արագացնի որոշումների կայացման գործընթացները, կարծում է եվրոպացի պաշտոնյան։
«Հարուստ և ապահով Ուկրաինան բխում է մեր շահերից։ Ամենաուշը Ռուսաստանին դիմադրությունից հետո պարզ դարձավ` Ուկրաինայի տեղը ԵՄ-ում է։ Այս կերպ ԵՄ-ն ցույց կտա, որ աշխարհաքաղաքական տեսանկյունից գործունակ է»,- հավելել է նա։
Ըստ Միշելի՝ «ամբողջ աշխարհը և, ինչպես երևում է՝ Վլադիմիր Պուտինը նույնպես», զարմացած են, թե որքան արագ Եվրամիությունը կարողացավ համաձայնության գալ Ռուսաստանի դեմ Ուկրաինա ներխուժելու համար կոշտ պատժամիջոցների շուրջ:
«Դժվար թե որևէ մեկը սպասում էր, որ մենք առաջինը զենք կմատակարարենք Ուկրաինային»,- նշել է նա։
Հարցին, թե որն է համարում ամենալուրջ ձախողումը Եվրոպական խորհրդի ղեկավարի պաշտոնում իր պաշտոնավարման ընթացքում, Միշելն ասել է. «Մենք չկարողացանք կանգնեցնել Ռուսաստանին Ուկրաինայի վրա հարձակվելուց, դրա հետևանքները սարսափելի են»:
