Հայաստանում օտարերկրացի աշխատողներն ավելացել են․ թրաֆիքինգի ակնհայտ դրսևորումներ կան․ Ավետիսյան․ ՏԵՍԱՆՅՈՒԹ

«ՀՀ օրենսդրությամբ օտարերկրացիները Հայաստանում կարող են աշխատել՝ աշխատանքի թույլտվության հիման վրա․ կան թույլտվության հստակ կանոնակարգեր։

Մենք տևական ժամանակ է ականատես ենք լինում, որ տարբեր երկրներից հատկապես Հնդկաստանից, նույնիսկ Պակիստանից մեծ թվով քաղաքացիներ են գալիս Հայաստան և որոշակի աշխատանք են իրականացնում։ Այս առումով կարևոր են պետության կանխարգելիչ գործողությունները և կարգավորիչ դերակատարումը։

Ականատես եք լինում օրենսդրության կոպտագույն խախտումների, քանի որ օտարերկրացի աշխատողների աշխատանքային իրավունքների պաշտպանության ողջ ծավալից չեն օգտվում»,- ՀՀ կառավարություն-Ազգային ժողով հարցուպատասխանի ժամանակ այս դիտարկումն արեց պատգամավոր Թադևոս Ավետիսյանը։

Աշխատանքի և սոցիալական հարցերի նախարար Նարեկ Մկրտչյանն ի պատասխան հաստատեց, որ ՀՀ-ում տնտեսական ակտիվությանը զուգահեռ նկատվում է դինամիկա՝ օտարերկրացիներ են գալիս Հայաստանի տարբեր ոլորտներում աշխատելու։

«Մենք ակտիվ աշխատանքներ ենք իրականացնում ինչպես Հնդկաստանի կառավարության մեր գործընկերների հետ, այնպես էլ ՀՀ-ում Հնդկաստանի դեսպանի հետ, մշակվում է աշխատանքային միգրացիայի համաձայնագիր, որպեսզի հախուռն իրավիճակները կարգավորվեն»,- վստահեցրեց նախարարը՝ հավելելով, որ որոշակի խախտումներ են արձանագրվել առողջապահության տեսչական մարմնի կողմից։

Մկրտչյանն ընդգծեց, որ ոչ միայն Հնդկաստանի, այլ տարբեր երկրների գործընկերների հետ համատեղ աշխատանքներ են իրականացվում, մշակում են կազմակերպված աշխատանքային միգրացիայի միջպետական համաձայնագրեր։

Ավետիսյանը մտահոգություն հայտնեց՝ նշելով՝ կան դեպքեր, երբ 8000 դրամ է վճարվում մեկին, ով այդ գումարը վերցնելով՝ աշխատանքն ինքը չի իրականացնում, այլ 5000 դրամով աշխատեցնում է օտարերկրացուն․ «Այստեղ որոշակի չարաշահումների, թրաֆիկինգի ռիսկեր կան»։

Մանրամասները՝ տեսանյութում։