11.12.2024 | 15:31
Մեկ օրում բացահայտվել է հանցագործության 163 դեպք, որոնցից 3-ը՝ նախկինում կատարված
Կոչ ենք անում Ադրբեջանին՝ ապահովել Լաչինի միջանցքով անարգել տեղաշարժը․ ԵԱՀԿ-ում ԱՄՆ դեսպանը հայտարարել է, որ ուժի կիրառումն անընդունելի է
Քաղաքականություն
13.09.2023 | 15:37
Հայաստանի նախաձեռնությամբ նախօրեին Արցախի վերաբերյալ հրավիրված ԵԱՀԿ մշտական խորհրդի հատուկ նիստում ԱՄՆ դեսպան Մայքլ Քարփենթերը հայտարարել է, որ Միացյալ Նահանգները խորապես անհանգստացած է Լեռնային Ղարաբաղում արագորեն վատթարացող հումանիտար իրավիճակի կապակցությամբ։ Նա նշել է, որ պետքարտուղար Բլինքենը զրուցել է Հայաստանի վարչապետ Նիկոլ Փաշինյանի և Ադրբեջանի նախագահ Իլհամ Ալիևի հետ՝ արտահայտելու Միացյալ Նահանգների մտահոգությունը և ընդգծելու երկխոսության, փոխզիջումների անհրաժեշտությունը, կողմերի միջև վստահության ձևավորման կարևորությունը:
«Մենք նշում ենք, որ մարդասիրական պաշարները տեղակայված են ինչպես Լաչինի, այնպես էլ Աղդամի երթուղիների մոտ, և մենք կրկնում ենք մեր կոչը՝ անհապաղ և միաժամանակ բացել երկու միջանցքները՝ թույլ տալու համար անհրաժեշտ մարդասիրական մատակարարումները Լեռնային Ղարաբաղի տղամարդկանց, կանանց և երեխաներին, ինչպես նաև վերականգնել գազի և էլեկտրաէներգիայի հոսքերը։ Մենք նաև կոչ ենք անում առաջնորդներին՝ չձեռնարկել որևէ գործողություն, որը բարձրացնում է լարվածությունը կամ շեղում այս նպատակից: Վեճերը լուծելու համար ուժի կիրառումն անընդունելի է։ Կրկնում եմ՝ վեճերը լուծելու համար ուժի կիրառումը բացարձակապես անընդունելի է»,- ասվում է հայտարարության մեջ։
Դեսպանը նշել է, որ հետևողականորեն ասել են, որ Լաչինի միջանցքը պետք է բաց լինի առևտրային, հումանիտար և մասնավոր երթևեկության համար՝ համաձայն Հաագայի դատարանի փետրվարի 22-ի վճռի, նաև ընդգծում իրավիճակի սրությունն ու հրատապությունը, որին բախվում են Լեռնային Ղարաբաղի բնակիչները։
«Մենք կրկին կոչ ենք անում Ադրբեջանին ձեռնարկել իր տրամադրության տակ եղած բոլոր միջոցները՝ ապահովելու մարդկանց, տրանսպորտային միջոցների և բեռների անարգել տեղաշարժը Լաչինի միջանցքով երկու ուղղություններով։ Մենք այս ուղերձը փոխանցել ենք ինչպես հրապարակայնորեն, այնպես էլ մասնավոր կերպով Ադրբեջանի կառավարությանը բոլոր մակարդակներով, և հորդորում ենք Լեռնային Ղարաբաղի բնակիչներին ընդունել մատակարարումները։ Ես խորապես մտահոգված եմ, որ եթե կողմերի կողմից անհապաղ քայլեր չձեռնարկվեն՝ իրավիճակին լուծում գտնելու համար, ապա Լեռնային Ղարաբաղի ներսում հումանիտար իրավիճակը կշարունակի վատթարանալ»,- ասել է Քարփենթերը։
Նա ընդգծել է, որ Հարավային Կովկասում լարվածության վերջին աճի լույսի ներքո ԱՄՆ-ը կշարունակի խստորեն աջակցել Հայաստանի և Ադրբեջանի ջանքերին՝ լուծելու առկա խնդիրներն ուղիղ երկխոսության միջոցով՝ նպատակ ունենալով հասնել արժանապատիվ և կայուն խաղաղության:
«Կայուն խաղաղությանն ուղղված բանակցությունները պետք է հիմնված լինեն տեղում երկխոսության, միմյանց ինքնիշխանության և տարածքային ամբողջականության փոխադարձ հարգանքի հիման վրա հարաբերությունների կարգավորման և Լեռնային Ղարաբաղում բնակվող էթնիկ հայերի իրավունքների և անվտանգության պաշտպանության վրա։ Սա այս հակամարտությունը լուծելու միակ ճանապարհն է։ Միացյալ Նահանգները կոչ է անում զսպված լինել ցանկացած գործողությունից, որը կարող է խաթարել վստահությունը, վտանգել երկխոսությունը կամ է՛լ ավելի հետաձգել միջանցքի բացումը։ Մենք խրախուսում ենք ուղիղ բանակցությունները բոլոր մակարդակներում, այդ թվում՝ Բաքվի պաշտոնյաների և Լեռնային Ղարաբաղի բնակչության ներկայացուցիչների միջև։ Մենք կրկնում ենք, որ Հայաստանի և Ադրբեջանի միջև ցանկացած խաղաղ համաձայնագիր պետք է պաշտպանի Լեռնային Ղարաբաղի բնակիչների իրավունքներն ու անվտանգությունը»,- հայտարարել է ԱՄՆ դիվանագետը։
Էմմա Չոբանյան
