Թատրոն կարող է լինել պատի վրա, տանիքին, լողավազանում՝ ամենուր. ապաքաղաքական զրույց Արթուր Ղուկասյանի հետ. ՏԵՍԱՆՅՈՒԹ

Factor TV-ի A-politic հաղորդաշարի հյուրն է «Հայֆեստ» արվեստի միջազգային փառատոնի հիմնադիր և նախագահ Արթուր Ղուկասյանը: Նրա կարծիքով՝ թատրոնը կարևոր դեր է խաղում նաև այն ժամանակ, երբ հասարակությունը, երկիրը ճգնաժամի մեջ են: Պարզապես պետք է հասկանալ, որ թատրոնն այսօր կարող է կազմակերպվել ամենուր՝ պատի վրա, ջրում, տրանսպորտում: Եվ հատկապես համավարակն ու պատերազմը ցույց տվեցին, որ անհրաժեշտ է ընդլայնել թատրոնի շրջանակները:

Թատերական պրոդյուսերի աշխատանքի զգալի մասը կապված է տարբեր նախագծերի համար հովանավորներ փնտրելու հետ: «Հայֆեստի» դեպքում երբեմն որոշ մասնակցություն է ունենում նաև պետությունը: Արթուր Ղուկասյանը գտնում է, որ Սնուփ Դոգի վրա պետությունը չպիտի գումարներ ծախսի, բայց եթե մասնավոր ներդրողը ցանկանում է միջոցներ ներդնել նման նախագծերի մեջ, ապա դա, ըստ նրա, միանգամայն նորմալ երևույթ է:

Ո՞րն է թատերական պրոդյուսերի գործառույթը՝ գաղափարնե՞ր առաջարկել, թե՞ իրագործել ռեժիսորների մտահղացումները: Ըստ հաղորդման հյուրի՝ երկու հմտություններն էլ անհժրաժեշտ են: Պրոդյուսերը պետք է ստեղծագործական դաշտ բացի ներկայացման հեղինակների համար, բայց, մյուս կողմից, նրանց ուղղություն ցույց տա, որպեսզի վերջնական արդյունքը հասանելի լինի հանդիսատեսին:

Արթուր Ղուկասյանի կարծիքով՝ ֆիլմը կամ ներկայացումը կարող են լինել «գերկոմերցիոն», բայց որակյալ: Սակայն նրա համար ավելի հետաքրքիր է զարգացնել արվեստը, բարձրացնել հանդիսատեսի մակարդակը՝ առավել բարդ ստեղծագործություններ մատուցելու համար:

Մանրամասները՝ տեսանյութում:

Արամ Աբրահամյան