Գեներացնելով ատելության խոսքը՝ փորձում են ստանալ տնտեսական և այլ դիվիդենտներ. ապաքաղաքական զրույց Արա Ղազարյանի հետ. ՏԵՍԱՆՅՈՒԹ

Factor TV-ի A-politic հաղորդաշարի հյուրն է իրավաբան, մարդու իրավունքների հարցերով փորձագետ Արա Ղազարյանը: Նրա կարծիքով՝ Հայաստանում ձևավորվում է յուրահատուկ իրավական մշակույթ, որը շատ հարցերում ավելի զարգացած է, քան որոշ հետխորհրդային երկրներում, և ադապտացված է հայաստանյան իրողություններին: Հաղորդման հյուրը նշում է, որ արդեն մոտ մեկ տասնամյակ չի հիշատակվում «իրավական նիհիլիզմ» հասկացությունը: Որպես այդ երևույթի հաղթահարման դրսևորում՝ Արա Ղազարյանը նշում է, որ Հայաստանում այլև ոչ ոք չի կնքում տան վաճառքի պայմանագիր՝ առանց իրավաբանի մասնակցության։

Մարդու իրավունքների հարցերով փորձագետը վստահ է, որ ատելության խոսքի, թշնամանք հրահրելու գործերով դատաքննությունն ի վիճակի է նույնականացնել այդ հանցագործությունները, և ազգային ու միջազգային պրակտիկան վերջին տարիներին վկայում է, որ այդ ուղղությամբ հնարավոր է կատարել լուրջ քայլեր: Ավելի բարդ են այն դեպքերը, երբ լրագրողները կամ օգտատերերը կիրառում են «բուլինգի», «թրոլինգի» և այլ նմանատիպ հնարքներ: Այստեղ կոշտ միջոցները կարող են ավելի շատ վնաս, քան օգուտ բերել:

Ըստ Արա Ղազարյանի՝ ատելության բուրգը կազմված է մի քանի աստիճանից: Առաջին աստիճանում են կենցաղային նախապաշարումները, երբ, ենթադրենք, բակում խաղալուց մեծամասնությունը պիտակավորում է իրենից ինչ-որ բանով տարբերվող երեխային: Արդեն այս փուլից սկսած անհրաժեշտ է հասարակության, դպրոցի, ծնողների միջամտությունը, որպեսզի այդ կենցաղային միջադեպերից անցում չկատարվի խտրականության ավելի լուրջ դրսևորումների:

Մանրամասները տեսանյութում:

Արամ Աբրահամյան