24.07.2026 | 23:45
Գագիկ Ծառուկյանի նկատմամբ նոր հանրային քրեական հետապնդում է հարուցվել. փաստաբան
Զախարովան՝ ՌԴ-Ադրբեջանի թեժ բանավեճի պայմաններում Մոսկվայում եռակողմ հանդիպում անցկացնելու մասին․ ՏԵՍԱՆՅՈՒԹ
Քաղաքականություն
20.07.2023 | 14:13
Մոսկվայում Հայաստանի և Ադրբեջանի ԱԳ նախարարների հանդիպման անցկացման շանսերը շատ լավն են։ Այս մասին իր ամենշաբաթյա ճեպազրույցում ասել է ՌԴ ԱԳՆ պաշտոնական ներկայացուցիչ Մարիա Զախարովան՝ մեկնաբանելով լարագրողի հարցը, թե որքանով է հնարավոր նման եռակողմ հանդիպումը վերջին շրջանում ՌԴ-Ադրբեջան թեժ բանավեճից հետո։
«Շանսերը շատ լավն են: Երբ փորձագետներից, ովքեր այժմ աշխատում են նման հանդիպման անցկացման ուղղությամբ, ժամկետների վերաբերյալ կոնկրետ առաջարկ ստանանք, անպայման կկիսվենք ձեր հետ»,- ասել է Զախարովան:
Հիշեցնենք, որ ՌԴ-ի և Ադրբեջանի միջև հարաբերությունները վերջին շրջանում սրվել էին։ Բանն այն էր, որ ՌԴ-ն կոչ էր արել Բաքվին խաղաղ ճանապարհով լուծել Ղարաբաղի հարցը և անվտանգության երաշխիքներ տալ այնտեղ ապրող հայերին։ Սակայն ՌԴ ԱԳՆ-ի այս հայտարարությունը «տարակուսանք ու հիասթափություն» էր առաջացրել Ադրբեջանի ԱԳՆ-ում, քանի որ, ինչպես այնտեղից հայտարարել են, հենց Բաքուն է գործնական քայլեր ձեռնարկում Հայաստանի հետ հաշտության պայմանագիր կնքելու համար։
Ադրբեջանի այս հայտարարությունների կապակցությամբ օրեր առաջ ՌԴ ԱԳ փոխնախարար Անդրեյ Ռուդենկոն գերատեսչությունում հանդիպել էր Մոսկվայում Ադրբեջանի արտակարգ և լիազոր դեսպան Փոլադ Բյուլբյուլօղլիի հետ։
Հանդիպման վերաբերյալ ՌԴ ԱԳՆ տարածած հայտարարության մեջ նշվում է, որ անդրադարձ է եղել ՌԴ ԱԳՆ-ի՝ այս տարվա հուլիսի 15-ի հայտարարության առնչությամբ Ադրբեջանի ԱԳՆ-ի ոչ կոռեկտ մեկնաբանություններին։
«Ընդգծվել է, որ Ռուսաստանի Դաշնությունը միշտ հարգանքով է վերաբերվել և վերաբերվում Ադրբեջանի տարածքային ամբողջականությանը, լիովին հավատարիմ է դաշնակցային համագործակցության մասին երկկողմ հռչակագրի ոգուն և տառին։ Միևնույն ժամանակ, դա չի չեղարկում հայ-ադրբեջանական հարաբերությունների կարգավորման գործընթացը համակողմանիորեն խթանելու, օրակարգային բոլոր հարցերը, այդ թվում՝ Լեռնային Ղարաբաղի բնակչության իրավունքների և անվտանգության ապահովումը, բացառապես խաղաղ քաղաքական և դիվանագիտական մեթոդներով լուծելու խնդիրը»,- ասված էր ՌԴ ԱԳՆ հաղորդագրությունում:
Մանրամասները՝ տեսանյութում։
Տաթև Ֆռանգյան
