Կարծում եմ, որ Դավիթ Հարությունյանն անարդար կերպով է հեռացվել դատական համակարգից. Դավիթ Բալայան․ ՏԵՍԱՆՅՈՒԹ

Իմ կարծիքով՝ դատական դեպարտամենտը կանխորոշել է այն դատավորների շրջանակը, ովքեր իրավունք ունեն առաջադրվելու, ես գտնում եմ, որ այդպես չի կարելի անել: Այս մասին այսօր Դատավորների ընդհանուր ժողովից առաջ լրագրողների հետ զրույցում նշեց Երևանի ընդհանուր իրավասության դատարանի դատավոր Դավիթ Բալայանը:

Անդրադառնալով հարցին, թե ինչ է պատրաստվում անել այդ առնչությամբ, Բալայանը պատասխանեց, որ ժողովի ընթացքում հնարավոր է հայտարարությամբ հանդես գա. «Կփորձեմ դատավորներին տեղ հասցնել այն, ինչ հիմքով դատարան եմ դիմել»,- ասաց Դավիթ
Պատասխանելով հարցին՝ արդյո՞ք որևէ թեկնածուի օգտին քվեարկելու է, Բալայանը պատասխանեց, որ չի ցանկանում ժողովից առաջ իր դիրքորոշումն արտահայտել:

Անդրադառնալով դատավոր Դավիթ Հարությունյանի լիազորությունները դադարեցնելու վերաբերյալ ԲԴԽ-ի որոշմանը՝ դատավորը կարծիք հայտնեց․ «Դավիթ Հարությունյանն անարդար կերպով է հեռացվել դատական համակարգից»:

Նշենք, որ այսօր Դատավորներն ընդհանուր ժողով է հրավիրվել, որի օրակարգում Բարձրագույն դատական խորհրդի դատավոր անդամի ընտրության հարցն է։ ԲԴԽ-ում դատավոր անդամի թափուր հաստիք է առաջացել այն բանից հետո, երբ դատավոր Մեսրոպ Մակյանը հրաժարականի դիմում է ներկայացրել։

Բարձրագույն դատական խորհրդի կայքում առկա տեղեկատվության համաձայն՝ ԲԴԽ դատավոր անդամի թեկնածուներն են Արմավիրի մարզի ընդհանուր իրավասության դատարանի դատավոր Էդգար Հովհաննիսյանը, Արագածոտնի մարզի ընդհանուր իրավասության դատարանի դատավոր Սուրեն Մնոյանը և Լոռու մարզի ընդհանուր իրավասության դատարանի դատավոր Վարդուհի Հովնանյանը։

ԲԴԽ անդամի ընտրության համար ծանուցագրեր են ստացել միայն մարզերի ընդհանուր իրավասության դատարանի դատավորները, թեև ԲԴԽ անդամ ընտրվելու չափանիշին համապատասխանում են նաև այլ դատավորներ։

Մանրամասները՝ տեսանյութում։