14.12.2025 | 13:11
ՀՀ դրոշ՝ Սուրբ Գևորգ եկեղեցում. Արմավիրի թեմում Փաշինյանի ցանկությունը չեն անտեսել
Թուրքիան Չինաստանի, ՌԴ-ի և Հարավային Կորեայի հետ բանակցում է նոր ատոմակայանների կառուցման շուրջ
Քաղաքականություն
11.07.2023 | 23:30
Անկարան բանակցություններ է վարում Չինաստանի, Ռուսաստանի և Հարավային Կորեայի հետ՝ երկրում երկրորդ ու երրորդ ատոմակայանների կառուցման շուրջ։ Այս մասին հայտարարել է Թուրքիայի էներգետիկայի նախարար Ալփարսլան Բայրաքթարը, գրում է Al Monitor-ը։
Թուրքական լրատվամիջոցների հետ զրույցում Բայրաքթարն ասել է, որ Անկարան կարագացնի նոր ԱԷԿ-ների կառուցման աշխատանքները, և երեք երկրների հետ բանակցությունները շարունակվում են։ Նա նշել է, որ երկրորդ ԱԷԿ-ը կառուցվելու է սևծովյան Սինոփ նահանգում։
«Մեզ միանշանակ անհրաժեշտ է ատոմակայան Թրակիայի տարածաշրջանում»,- հավելել է նա՝ նկատի ունենալով հյուսիսարևմտյան տարածաշրջանը, որը Թուրքիան դիտարկում է որպես իր երրորդ կայանի տեղակայման վայր:
Բայրաքթարն ասել է, որ ինչպես այս ատոմակայանների, այնպես էլ հնարավոր մոդուլային միջուկային օբյեկտների համար Անկարան աշխատում է ԱՄՆ-ի և Մեծ Բրիտանիայի հետ։
«Էներգետիկ դիվանագիտությունը կմնա որպես մեր նախարարության օրակարգային ամենակարևոր կետերից մեկը»,- ասել է թուրք նախարարը։
Նա նշել է, որ երեք երկրներն աշխատում են 200 միլիարդ դոլար արժողությամբ մի շարք նախագծերի ուղղությամբ, ինչպես նաև մտադիր են մեծացնել վերականգնվող և միջուկային էներգիայի աղբյուրների մասնաբաժինը՝ որպես 2053 թվականին զրոյական արտանետումների հասնելու՝ Թուրքիայի նպատակի մաս, որը հայտարարվել է դեռ 2021 թվականին:
Հավելենք, որ ռուսական Ռոսատոմը Մերսին նահանգում կառուցում է Թուրքիայի առաջին ատոմակայանը։ Թուրքիայում նախագահական ընտրությունների նախաշեմին էլ նախագահ Ռեջեփ Թայիփ Էրդողանը և Ռուսաստանի նախագահ Վլադիմիր Պուտինն առցանց մասնակցել էին առաջին էներգաբլոկում միջուկային վառելիքի բեռնման արարողությանը:
Բայրաքթարը նաև հավելել է, որ Մերսինի «Աքքույու» ատոմակայանը հաջորդ տարի արդեն էլեկտրաէներգիա կարտադրի, իսկ Անկարան բանակցություններ է վարում Ֆրանսիայի հետ ատոմակայանի անկախ հսկողության համար։
Էմմա Չոբանյան
