Հայտարարում էին, որ ՀՀ-ից Արցախ սպառազինություն էր բերվում. սքաներ սարք դրեցին. Արցախի պետնախարար․ ՏԵՍԱՆՅՈՒԹ

Որոշակի ժամանակ ճանապարհը փակ պահելը հանգեցրեց նրան, որ դադարեցվեց Կաշենի հանքավայրի գործունեությունը, հանքանյութի արտահանումը։ Այդ մասին նույնիսկ հայտարարություն արվեց, կազմակերպությունը շեշտեց, որ դադարեցնում է իր գործունեությունը՝ միջազգային փորձագետներին ընձեռելով բնապահպանական բոլոր ուղղությունները հետազոտելու հնարավորություն։ Այս մասին այսօր կայացած Ստեփանակերտ-Երևան հեռուստակամուրջ-ասուլիսի ընթացքում նշեց  ԱՀ պետնախարար Գուրգեն Ներսիսյանը։

«Թվում էր, թե ադրբեջանական կողմի համար իրավիճակը հանգուցալուծված է, ճանապարհն այլևս փակ պահելու անհրաժեշտություն չկա, այն նպատակը, որը իբրև հետապնդվում էր, այլևս իրագործված է։ Բայց, իրականում՝ ոչ։

Ադրբեջանն անմիջապես առաջ քաշեց Արցախը Հայաստանին կապող ճանապարհին սքաներ սարքի տեղադրման հարցը, այս անգամ պատճառաբանելով, թե Հայաստանից Արցախ զենք է տեղափոխվում։ Ադրբեջանը հայտարարեց, որ սքաներ սարքը պետք է գործի ոչ թե խաղաղապահների, այլ ադրբեջանցիների կողմից՝ կառավարվելով որոշակի հեռավորությամբ տեղադրված խցիկում ծառայություն իրականացնողների միջոցով։ Հետո տեղադրվեց անցակետ, սքաներ սարք, սկսվեցին Կարմիր խաչի ու ռուս խաղաղապահների միջոցով իրականացվող բեռնափոխադրումների ստուգումներ, քաղաքացիական անձանց ստուգումներ, հետո հասկացան, որ սքաներ սարքը թեև տեղադրել, բայց նույնիսկ չեն էլ միացրել, հետո հանեցին սքաներ սարքը։

Բնապահպանական խնդիրների պատրվակով սկսված և յուրաքանչյուր տասը օրը մեկ տրանսֆորմացիայի ենթարկվող քաղաքականությունը իրականում իր անհրաժեշտ արդյունքը չէր տալիս, Արցախի ժողովուրդը չէր կոտրվում, օգնություն չէր մուրում և համբերատար հետևում էր, թե երբ խելքի կգա միջազգային հանրությունը և ի վերջո աչքերը կբացի ու կտեսնի այն, ինչ կատարվում էր»,- նշեց Ներսիսյանը։

Մանրամասները՝ տեսանյութում։