Տնտեսական աճի ցուցանիշները կդանդաղեն, պոտենցիալն անվերջ չէ․ բայց հոսքերը դեռ պահպանվում են․ Նարեկ Կարապետյան․ ՏԵՍԱՆՅՈՒԹ

Հայաստանում տնտեսական ակտիվության ցուցանիշը (ՏԱՑ) շարունակում է բարձր աճի տեմպով ընթանալ առաջ։ Միևնույն ժամանակ, ունենք իրավիճակ, երբ, ըստ Կենտրոնական բանկի, գնաճը հիմնականում ընդունելի մակարդակում է։ Այս և այլ թվերի, ցուցանիշների մասին զրուցել ենք տնտեսագետ, «Ամբերդ» վերլուծական կենտրոնի փորձագետ Նարեկ Կարապետյանի հետ։

-Պարո՛ն Կարապետյան, ունենք տնտեսական ակտիվության ցուցանիշի՝ առաջին 5 ամիսների տվյալները, և 12,5 տոկոս աճ ունենք, որը շատ նման է նախորդ տարվա տնտեսական աճի ցուցանիշին։ Ինչպե՞ս եք սա մեկնաբանում։

-Իրականում այս ընթացքում՝ տարեսկզբից տեղի ունեցած տնտեսական զարգացումները նույնությամբ շարունակում են նախորդ տարվա երկրորդ կեսի զարգացումները։ Էական փոփոխություն տնտեսական աճի գործոնների մեջ չի նկատվել։ Այդ առումով սա բնականոն երևույթ է։

-Նախորդ տարի մեր աճն ավելի շատ պայմանավորված էր ծառայությունների ոլորտով, և ամենաբարձր ցուցանիշները լինում էին հենց այդ ոլորտում։ Հիմա առևտուրն է առաջատար՝ 24,5 տոկոսով։ Սա բացատրվում է հենց արտաքի՞ն առևտրով։

-Ըստ էության՝ այո, վերարտահանումով։

–Ինչո՞ւ մյուս ոլորտները հետ ընկան։

-Բնականաբար, այստեղ դրսևորվել է բազայի էֆեկտը, բայց ծառայությունների ոլորտը էլի շարունակում է բարձր տեմպով աճել։ Իհարկե, այդ աճի պոտենցիալն անվերջ չէ, և այդ ցուցանիշները պետք է դանդաղեն։ Բայց, ամեն դեպքում, քանի դեռ այդ ներհոսքը պահպանվում է, դրանք շարունակվում են և՛ կապիտալի, և՛ մարդկանց ներհոսքի ձևով, այդ առումով դեռևս բարձր ցուցանիշների ականատես ենք։

Հարցազրույցն ամբողջությամբ՝ տեսանյութում։

Գարիկ Հարությունյան