Ալիևին ԱՄՆ-ում համեմատեցին Սադամ Հուսեյնի հետ․ սա Ադրբեջանին պատասխանատվության ենթարկելու ուղերձ է․ Արա Պապյան․ ՏԵՍԱՆՅՈՒԹ

Factor TV-ի հարցազրույցը դիվանագետ, քաղաքագետ Արա Պապյանի հետ

-Նիկոլ Փաշինյանն այսօր նորից բանակցություններից է խոսել, ասում է՝ «բոլոր ջանքերը պետք է գործադրել խաղաղության հաստատման և հարաբերությունների կարգավորման պայմանագիր կնքելու համար, և առաջիկայում ԱԳ նախարարի գլխավորած պատվիրակությունը Վաշինգտոն է գնում՝ հենց այդ տրամադրվածությամբ»։ Պարո՛ն Պապյան, բազմիցս է խոսվում, երկու կողմից էլ, որ սկզբունքային հարցերում տարաձայնությունները պահպանվում են։ Այս իրավիճակում, Ձեր կարծիքով, ինչպե՞ս է հնարավոր խոսել խաղաղության պայմանագիրը հնարավորինս շուտ ստորագրելու մասին։

-Ես ինչքան հիշում եմ արցախյան հակամարտությունը, պարբերաբար հայտարարություններ լինում էին, որ մենք շատ մոտ ենք այդ հակամարտությունը ստորագրելուն, ուր որ է՝ կստորագրվի համապատասխան փաստաթուղթ։ Մենք տեսանք, որ վերջնական նման փաստաթուղթ չստորագրվեց, որը, գիտեք, հանգեցրեց պատերազմի և այլն։ Ես կարծում եմ՝ նույնը շարունակվելու է դեռևս։ Հայտարարել՝ չի նշանակում իրականություն դարձնել։ Այստեղ շատ կարևոր է հասկանալ՝ արդյո՞ք Ադրբեջանն ուզում է, թե՞ ոչ Նիկոլ Փաշինյանի արտահայտած 29.800 քառակուսի կիլոմետրով խաղաղության պայմանագիր կնքել։ Միանշանակ՝ Ադրբեջանը չի ուզում։

-Միջնորդները՝ ռուսական, արևմտյան, այդ թվում՝ վաշինգտոնյան կողմերը, չե՞ն հասկանում, որ Ադրբեջանը չի ուզում, և պարբերաբար ինչ-որ լավատեսական հայտարարություններ են հնչում։

-Իհարկե՝ իրենք գիտեն, և, բնականաբար, կա նաև ներքին բանակցային գործընթաց, որի մասին մենք չգիտենք, փակ է, բայց, գիտեք, կան չգրված օրենքներ։ Օրենքներից մեկը հետևյալն է, որ նման լավատեսական բարձրաձայնումը, կարծեք, նպաստում է, ընդհանուր մթնոլորտ է ստեղծում ավելի բարենպաստ բանակցությունների համար։ Դա մի կետ է։ Մյուս կետն էլ այն է, որ կողմերից յուրաքանչյուրը ուզում է ցույց տալ իր դերի կարևորությունը։ Այստեղ միայն հակամարտության լուծումը չէ, այլև՝ թե ում հովանու ներքո կլուծվի այդ հակամարտությունը։ Եվ մենք տեսնում ենք, որ այդ գործընթացը, ըստ էության, Վաշինգտոն-Բրյուսել-Մոսկվա կարուսելով պտտվում է։ Հիմա հերթը Վաշինգտոնինն է։

Հարցազրույցն ամբողջությամբ՝ տեսանյութում։

Թամարա Հակոբյան