15.01.2026 | 19:28
Թուրքիան հավանություն չի տալիս ԱՄՆ-ի կողմից Իրանի վրա հնարավոր հարձակմանը
Լավրովը մեղադրում է Երևանի՞ն, թե՞ Արևմուտքին․ ՌԴ արտգործնախարարի հայտարարության արձագանքները․ ՏԵՍԱՆՅՈՒԹ
Քաղաքականություն
21.06.2023 | 20:35
Ռուսաստանի արտաքին գործերի նախարար Սերգեյ Լավրովը հայտարարում է ՀԱՊԿ-ն պառակտելու փորձերի մասին։ Ռուս բարձրաստիճան պաշտոնյան այդ հարցում մեղադրեց արևմտյան պետություններին ՀԱՊԿ արտգործնախարարների՝ Մինսկում կայացած նիստից հետո։
Թե Հայաստանի արտաքին գործերի նախարար Արարատ Միրզոյանն ինչ դիրքորոշում ունի ռուս գործընկերոջ հայտարարության առնչությամբ, գերատեսչության՝ այդ թեմայով տարածած հաղորդագրությունում անդրադարձ չկա։ ՀՀ փոխվարչապետ Մհեր Գրիգորյանն այսօր ԱԺ-ում Factor TV-ի հարցերին ի պատասխան նշեց՝ ՀԱՊԿ-ի հետ կապված խնդիրները Հայաստանի մասով գոյություն ունեն, սակայն նա խուսափեց նշել՝ արդյո՞ք Լավրովի մեղադրանքերը նաև Երևանին են ուղղված։
Մոսկվայից պարբերաբար հայտարարություններ են հնչում, որ հավաքական Արևմուտքը փորձում է հայ-ռուսական հարաբերությունները վատթարացնել և, ինչպես Լավրովն էր ասել, Ռուսաստանին դուրս քշել Կովկասից։
ՀՀ ԱԺ «Հայաստան» խմբակցության պատգամավոր Արթուր Խաչատրյանի խոսքով՝ Լավրովի՝ ՀԱՊԿ-ը պառակտելու մեղադրանքերը նաև ՀՀ-ին են ուղղված։
2022 թվականի սեպտեմբերյան մարտերից հետո Երևանը Մոսկվայից և ՀԱՊԿ անդամ մյուս պետություններից ադրբեջանական ագրեսիան դատապարտող քաղաքական գնահատական էր պահանջում։ Առ այսօր Հայաստանի դաշնակից համարվող պետությունները չեն դատապարտել Բաքվի ռազմական հանցագործությունները։
Տեղեկություններ են շրջանառվում, որ 2022 թվականի սեպտեմբերյան մարտական գործողություններից հետո Երևանն ԱԽ-ում քննարկել է ՀԱՊԿ-ի արդյունավետության հետ կապված հարցեր։ Արդյո՞ք ՀՀ-ն քննարկել է ՀԱՊԿ-ից դուրս գալու սցենարը, Մհեր Գրիգորյանը ո՛չ հերքում է, ո՛չ հաստատում։
Իշխանական պատգամավոր Վիգեն Խաչատրյանն էլ հակված է ՀԱՊԿ-ի հավանական պառակտման թեմայի փոխարեն քննարկման առարկա դարձնել կառույցի անգործությունը։ Ըստ նրա՝ ՔՊ-ականները փակ քննարկումներում բարձրաձայնում են ՀԱՊԿ-ի անարդյունավետության հարցերը։
Մանրամասները` տեսանյութում։
Հ․Գ․ Տեսանյութը մոնտաժվելուց հետո հայտնի դարձավ, որ ՀՀ ԱԺ «Քաղաքացիական պայմանագիր» խմբակցության պատգամավոր Վիգեն Խաչատրյանը հեռացել է կյանքից։ Factor TV-ն ցավակցում է գործչի հարազատներին կորստի կապակցությամբ։
Նարեկ Կիրակոսյան
