24.11.2024 | 12:19
Ռումինիայում նախագահական ընտրություններ են
Ադրբեջանը լկտիացե՛լ է, սադրո՛ւմ է՝ դրոշ դնելով, ուժ կիրառելու հիմք է պատրաստում․ կո՛շտ կանխարգելել․ Գուրգեն Սիմոնյան. ՏԵՍԱՆՅՈՒԹ
Քաղաքականություն
15.06.2023 | 17:02
Ինչո՞ւ է Ադրբեջանը կրկին սրում ռազմաքաղաքական առանց այն էլ լարված իրադրությունը։ Ըստ ՀՀ ԱԱԾ-ի՝ այսօր Ժամը 8։40-ի շրջանում Ադրբեջանի սահմանապահ ծառայության մի խումբ զինծառայողներ Հակարիի կամրջի ուղղությամբ առաջխաղացման փորձ են կատարել՝ ՀՀ տարածքում դրոշ տեղադրելու նպատակով, սակայն հայկական կողմի ձեռնարկած միջոցների արդյունքում ադրբեջանցի զինծառայողների առաջխաղացման և ՀՀ տարածքում դրոշ տեղադրելու փորձը կանխվել է: Մեկ ադրբեջանցի սահմանապահ է վիրավորվել։ Սա Ադրբեջանի կողմից սանձազերծված միակ միջադեպը չէ վերջին օրերին։
ԱՄՆ Պետքարտուղարության խոսնակ Մեթյու Միլլերն անդրադարձել է Երասխում կառուցվող մետալուրգիական գործարանի ուղղությամբ Ադրբեջանի կրակոցներին՝ հատուկ ընդգծելով, որ ադրբեջանական կրակոցներն ուղղված են եղել ամերիկյան մասնակցություն ունեցող ընկերությանը, և վիրավորվել են երկու քաղաքացիական աշխատակիցներ։
«Մենք կրկնում ենք սահմանների երկայնքով զսպվածության մեր կոչը, քանի որ կողմերն աշխատում են կայուն և հավասարակշռված խաղաղություն հաստատելու ուղղությամբ»,- Twitter-ի իր էջում գրել է Միլլերը։
Բացի այդ, ԵՄ դիտորդներ են երեկ այցելել Երասխ։ Այսօր էլ թիրախավորված գործարանի տարածք են այցելում ՀՀ-ում հավատարմագրված դիվանագետներ։
Քաղաքագետ Գուրգեն Սիմոնյանը Factor TV-ին տված հարցազրույցում տեսակետ է հայտնում, որ Բաքուն կզսպվի արևմտյան զգուշացումներից, բայց և կարծում է՝ Հայաստանի Զինված ուժերի կարողությունների բարձրացումն է ամենակարևոր գրավականն Ադրբեջանի ռազմական սադրանքները կասեցնելու հարցում։
«Ադրբեջանը դրոշ դնելով՝ սադրում է, և այդպիսով ուժ կիրառելու հիմք է պատրաստում։ Անհրաժեշտ է ադրբեջանական այս լկտիությունը կոշտ կանխարգելել։ Այս սադրանքներով Ադրբեջանը նաև պայթեցնում է խաղաղության գործընթացը։ Մենք պետք է Ադրբեջանին դիրքավորենք որպես ահաբեկչությունը հովանավորող պետություն, և ապագայում հասնենք նրան, որ ճանաչվի ահաբեկչական պետություն։ Այս լկտի և սանձարձակ վարքագիծը ՀՀ Զինուժի կոշտ արձագանքին պիտի արժանանա։ Ես վստահ եմ, որ խաղաղությունը կլինի լիակատար, եթե ՀՀ-ն պատժիչ գործողություն անի, բանակի կարողությունները բավարար լինեն դրան, քանի որ Բաքվին միշտ զսպում է ՀՀ Զինուժը»,- ասաց Գուրգեն Սիմոնյանը։
Հարցազրույցն ամբողջությամբ՝ տեսանյութում։
Ռոբերտ Անանյան
