Վճարովի ավտոկայանատեղիների գծանշումները կլինեն տարբեր գույների․ ՏԵՍԱՆՅՈՒԹ

ՀՀ կառավարությանը կվերապահվեն վճարովի ավտոկայանատեղերի գետնանշման առանձնահատկությունները։ Այս մասին Ազգային ժողովի այսօրվա նիստում ներկայացնելով նախագիծը՝ հայտնեց ՀՀ տարածքային կառավարման և ենթակառուցվածքների նախարարի տեղակալ Արմեն Սիմոնյանը:
«Ավտոտրանսպորտային միջոցների կայանատեղերի տեղական վճարի և վարչական վարույթի առանձնահատկությունների մասին» օրենքում փոփոխության նպատակն է բարեփոխել ավտոկայանատեղերի կազմակերպման գործընթացը:

«Ներկայումս չի կարգավորվում ըստ գոտիականության և ծառայողական ավտոկայանատեղերի կազմակերպման համար կիրառվող դրույքաչափերի սահմանման գործընթացը: Օրենքի նախագծով նախատեսվում է ՀՀ կառավարությանը վերապահել վճարովի ավտոկայանատեղերի գետնանշման առանձնահատկությունները»,- տեղեկացրեց փոխնախարարը:

Նրա խոսքով` նախագծի ընդունման արդյունքում կդյուրացվի համայնքային վճարովի ավտոկայանատեղերի տարբերակիչ գետնանշումների գույնի և ձևի վերաբերյալ փոփոխությունների իրականցման գործընթացը, կբարձրացվի տեղական ինքնակառավարման մարմինների կողմից առաջացող խնդիրների արագ կարգավորման հնարավորությունը, ինչպես նաև կապահովվի հաշմանդամություն ունեցող անձանց համար նախատեսված ավտոկայանատեղերի տարբերակված գունանշումը և հնարավոր կլինի իրականացնել տարբերակված դրույքաչափերի կիրառման մեխանիզմը`ըստ գոտիականության:

Պատգամավոր Ալխաս Ղազարյանը հետաքրքրվեց` արդոք նախագծի ընդունմամբ վճարումների չափերի մասով փոփոխություններ լինելո՞ւ են, թե` ոչ:
Արմեն Սիմոնյանը պատասխանեց, որ օրենքով արդեն սահմանված են առավելագույն վճարումների չափերը, իսկ թե որ դեպքում ինչպիսի վճար պետք է գանձվի, դա կսահմանվի համայնքի ավագանու որոշմամբ` համապատասխան գոտիավորում իրականացվելուց հետո:

Մանրամասները՝ տեսանյութում։