07.09.2026 | 17:13
Պեսկովը հայտնել է, որ Պուտինի և Փաշինյանի հանդիպման արդյունքներով ՌԴ-ն ու Հայաստանը կուսումնասիրեն առևտրային հարցերը
ԵՏՄ երկրներում կստեղծվի վերաապահովագրական ընկերություն․ ՀՀ-ն 450 մլն ռուբլի է ներդրել․ ՏԵՍԱՆՅՈՒԹ
Տնտեսություն
13.06.2023 | 13:28
Ազգային ժողովում քննարկվում է Եվրասիական վերաապահովագրական ընկերության հիմնադրման համաձայնագրի վավերացման հարցը։
Էկոնոմիկայի նախարար Վահան Քերոբյանի խոսքով՝ սա առաջին նմանատիպ ընկերությունն է, որի գլխամասը գտնվելու է Երևանում։
«Սա մեզ համար շատ կարևոր ձեռքբերում է, մենք կարողացանք մեր աշխատանքի արդյունքում լոբբի անել, որպեսզի ընկերությունը գլխամաս ունենա Երևանում։ Ընկերության հիմնադրման նպատակն է աջակցել Եվրասիական տնտեսական միության անդամ պետությունների միջև փոխադարձ առևտրի, ներդրումների ծավալների մեծացմանը, տնտեսական ինտեգրման զարգացմանը, ներդրումային գրավչության բարձրացմանը և երրորդ երկրների հետ միության առևտրատնտեսական կապերի ընդլայնմանը։
2022 թվականի փետրվարի 24-ից հետո մի շարք միջազգային վերաապահովագրական ընկերություններ հրաժարվեցին շարունակել ապահովագրել Հայաստանից և ոչ միայն Հայաստանից դեպի Ռուսաստանի Դաշնություն արտահանվող ապրանքների ապահովագրությունների վերաապահովագրումը։ Եվ դրանով ստեղծեցին էական դժվարություններ Հայաստանի արտահանողների համար։ Դրա հետևանքով մեր Արտահանման ապահովագրական ՓԲԸ-ն դժվարություններ ունեցավ։ Եվրասիական վերաապահովագրական ընկերության ստեղծումը թույլ է տալու, որ մենք ունենանք լրացուցիչ գործիք, որը կօգնի վերաապահովագրել նաև մեր Արտահանման ապահովագրական ՓԲԸ-ի ստանձնած ռիսկերը»,- ասաց Քերոբյանը։
Նախարարի խոսքով՝ Հայաստանը Եվրասիական վերաապահովագրական ընկերությունում մասնակցում է 3 տոկոսի չափով, ներդրվելու է 450 մլն ռուբլի։
«Այս ներդրումը մենք անում ենք նաև Հայաստանի ապահովագրական ՓԲԸ միջոցով, այսինքն՝ սկզբից գումարը համարվելու է Արտահանման ապահովագրական ընկերության կապիտալը, հետո այլևս ներդրում է արվելու վերաապահովագրական ընկերության մեջ։ Դրանով մենք նաև լուծում ենք այլ խնդիր, լրացնում ենք մեր ապահովագրական ընկերության կապիտալը, որը ևս պահանջված գործառույթ է»,- նշեց Քերոբյանը։
Նախարարը նաև հավելեց, որ Հայաստանից արտահանումը կտրուկ աճում է։
Մանրամասները՝ տեսանյութում։
