Միջուկային սպառազինության վրա ծախսվող գումարներն աճել են․ առաջատարներն են ԱՄՆ-ն, Չինաստանն ու ՌԴ-ն

Միջուկային զենքի վրա ծախսվող գումարներն աշխարհում աճել են՝ հասնելով 82,9 մլրդ դոլարի։ 2022 թ-ին աշխարհում հաշվարկվել է 12 500 միավոր միջուկային զենք, իսկ արդիականացմամբ ու ընդլայնմամբ զբաղվել է 9 երկիր։ Այս մասին ասվում է «Միջուկային զենքի արգելման միջազգային արշավ» ICAN զեկույցում, որը նախօրեին Ժնևում ներկայացվել է ICAN-ի քաղաքականության և հետազոտությունների համակարգող Ալիսիա Սանդերս-Զակրեի և համահեղինակ Սյուզի Սնայդերի կողմից, գրում է DW-ի ռուսական ծառայությունը։ Նշվում է, որ այս ցուցանիշը 3 տոկոսով ավելի է, քան 2021 թվականինը։

ԱՄՆ-ն այդ նպատակների համար հատկացրել է 43,7 մլրդ դոլար, որը մոտ 3-րդ մլրդ դոլարով զիջում է 2021 թ-ի ցուցանիշին։ ԱՄՆ-ին հաջորդում է Չինաստանը 11,7 մլրդ դոլար ծախսով, աճը կազմում է 6 տոկոս։ Ռուսաստանը զբացեղնում է երրորդ տեղը 9,6 մլրդ դոլարով, որը 5,74 տոկոսով ավելի է 2021 թ-ի ցուցանիշից։

Միաժամանակ, ծախսերի ամենամեծ աճը նկատվել է Հնդկաստանում՝ 21,8 տոկոս։ Մեծ Բրիտանիայի պարագայում  նույնպես երկնիշ ցուցանիշ է՝ 11 տոկոսից մի փոքր ավելի։

Ըստ Ստոկհոլմի Խաղաղության միջազգային հետազոտությունների ինստիտուտի՝ (SIPRI), Ռուսաստանը և ԱՄՆ-ն միասին տիրապետում են աշխարհի միջուկային զինանոցի շուրջ 90 տոկոսին:

«Իհարկե, այս ամբողջ միջոցները, որոնք ծախսվել են զանգվածային ոչնչացման զենքի վրա,ավելի լավ կլիներ ուղղել գլոբալ խնդիրների լուծմանը, որոնց մենք բախվում ենք»,-ասել է Սանդերս-Զակրեն։

Նա նշել է, որ 82,9 մլրդ դոլարով հնարավոր կլիներ մաքուր ջուր և սանիտարական նորմալ պայմաններ ապահովել շուրջ 1,3 մլրդ մարդու համար։