ՔՆՆԱՐԿՈՒՄ․ Ոստիկանական բռնություններ․ մերկացրել և ծաղրել են, հարվածելով՝ տապալել գետին․ կպատժվե՞ն բռնարարները

Օրերս Ժողովրդավարության հայկական ֆորումի ժամանակ ՀՀ վարչապետ Նիկոլ Փաշինյանը հայտարարեց, թե ժողովրդավարությանը ներքին սպառնալիքներ չկան։ Սակայն դատաիրավական համակարգի որոշումները, գործելակերպը լրջորեն կասկածի տակ է դնում վարչապետի պնդումը, և հարց է առաջանում՝ արդյո՞ք ժողովրդավարության պաշտպանությանը միտված պետական ինստիտուտներն ունակ են կատարել իրենց ֆունկցիան։

ՆԳՆ Դիլիջանի բաժնի քննչականի պետի կողմից անչափահասին հարվածներ հասցնելու աղմկոտ դեպքը գրանցվեց, և միայն հանրային մեծ աղմուկից հետո Դատախազությունը մեղադրանք առաջադրեց տվյալ անձին։ Մինչ այդ, Արգիշտի Քյարամյանի ղեկավարած Քննչական կոմիտեն քրեական հետապնդում չէր հարուցել անձի նկատմամբ՝ զղջալու հիմքով։ Գործը կրկին սկսեց քննվել այն բանից հետո, երբ հասարակությունը բողոքի ձայն բարձրացրեց, ոչ թե պետական ինստիտուտներն ադեկվատ արձագանքեցին։

Օրերս էլ տարածվեց տեսանյութ, որում երևում է, թե ինչպես է կարմիր բերետավորը հարվածում երիտասարդին, որն այնուհետ տապալվում է գետին։ Պահպանելով անմեղության կանխավարկածը՝ բոլոր դեպքերում, շեշտենք, որ իրավունքի պաշտպանությանը կոչված պետական ինստիտուտներն են կոպտորեն խախտում մարդկանց իրավունքները։

Արդյո՞ք այս իրավիճակը չի բացահայտում պետական ինստիտուտների՝ ոչ ժողովրդավարական բնույթը։ Սա սպառնալիք չէ՞ ժողովրդավարությանը։

Factor TV-ում այս հարցերի շուրջ հրավիրված քննարկմանը մասնակցում են «Լրագրողներ հանուն մարդու իրավունքների» ՀԿ նախագահ Ժաննա Ալեքսանյանը, Հելսինկյան ասոցիացիայի նախագահ Նինա Կարապետյանցը, կոմպոզիտոր, երգիչ Վահան Արծրունին, կառավարման փորձագետ Արշակ Սարգսյանը, ՄԻՊ աշխատակազմի Քրեական արդարադատության ոլորտում իրավունքների պաշտպանության վարչության գլխավոր մասնագետ Սեդա Ստեփանյանը։

Մանրամասները՝ տեսանյութում։