09.09.2026 | 09:44
Հանրապետությունում ավտոճանապարհներն անցանելի են
30 ուսուցիչ 400 հազար դրամ աշխատավարձ է ստանում` ներառյալ հարկերը. նախարար. ՏԵՍԱՆՅՈՒԹ
Հասարակություն
31.05.2023 | 14:48
Հայաստանում 1565 ուսուցիչ, ըստ կամավոր ատեստավորման արդյունքների, արդեն ստանում է բարձր աշխատավարձ և պարգևավճար։ Այս մասին Ազգային ժողովում լրագրողների հետ զրույցում հայտարարեց Հանրապետության կրթության, գիտության, մշակույթի և սպորտի նախարար Ժաննա Անդրեասյանը։
Նախարարի դիտարկմամբ՝ թե՛ օբյեկտիվության, թե՛ վարձատրության իրական բարձրացման հետ կապված մտահոգություններն անհիմն են, որովհետև մասնակիցների ավելի քան 50 տոկոսի վարձատրությունը բարձրանում է։ Այսինքն` սա հեշտ հաղթահարելի ատեստացիա է և ամբողջությամբ առարկայական չափորոշիչի և ծրագրի շրջանակներում է»,- նշեց նախարարը։
Անդրեասյանը հավելեց, որ ատեստավորման բոլոր հարցերը բացառապես ծրագրերի շրջանակում են։ Ինչ վերաբերում է թեստերի և առաջադրանքների որակին, նախարարությունը, հետևելով բողոքարկումներին, բարելավում է դրանք։
«Այս պահին էլ յուրաքանչյուր առարկայի գծով առաջադրանքների մեծ շտեմարան ենք մշակում, որպեսզի ուսուցիչները կարողանան այդ մեծ շտեմարաններից առաջադրանքներին ծանոթանալ, այնուհետև գալ ատեստավորման»,-ասաց նախարարը։
Անդրեասյանը նաև ատեստավորման արդյունքների թվեր ներկայացրեց. կանոնավոր ատեստավորման արդյունքում 1565 ուսուցչի աշխատավարձ է բարձրացել, նրանց շուրջ 30 տոկոսը ստանում է 300 հազար դրամ աշխատավարձ, շուրջ 30 ուսուցիչ էլ 400 հազար և ավելի գումար է ստանում։
Նախարարը նաև ուսուցիչների աշխատավարձի բարձրացման մեկ այլ մեխանիզմ նշեց․ «Զուտ մանկավարժական հմտությունների ստուգման պարագայում` ինչպես է դասը վարում, ինչպես է թեման պլանավորում, այստեղ 50 տոկոս հավելավճարի հնարավորություն կա։ Այսինքն` ատեստավորումը վարձատրության բարձրացման միակ մեխանիզմը չէ»։
Մանրամասները՝ տեսանյութում։
