Պետությունը պարտավոր է վերանայել օրենսդրական կարգավորումները․ Աշոտ Մելիքյան․ ՏԵՍԱՆՅՈՒԹ

Այսօր՝ մայիսի 31-ին, Ժողովրդավարության հայկական ֆորումի շրջանակներում տեղի է ունեցավ պանելային քննարկում «Անկախ լրատվամիջոցների հզորացման կարևորությունը ապատեղեկատվության դեմ պայքարում» թեմայով:

Քննարկումը վարում էր «Ֆակտոր» տեղեկատվական կենտրոնի նախագահ Արևիկ Սահակյանը: Նրա դիտարկմամբ՝ հանրությունն ունի իրավունք՝ ստանալու հավատարժան տեղեկատվություն, մինչդեռ շատ հաճախ ոչ որակյալ լրատվություն է մատուցվում և փորձ է արվում դա արդարացնել առկա խոչընդոտներով։

Անդրադառնալով Սահակյանի հարցին, թե ինչ կարող է անել լրագրողական հանրությունը՝ ինքնակարգավորման ավելի հստակ չափորոշիչներ մշակելու համար, որպեսզի անբարեխիղճ լրատվամիջոցն ուղղակի հեռացվի լրագրողական համքարությունից, Խոսքի ազատության պաշտպանության կենտրոնի ղեկավար Աշոտ Մելիքյանը նկատեց․ «Աշխարհով մեկ ոչ որակյալ լրատվությամբ զբաղվելը այն պայմաններում չէ, որ ոչ ձեռնտու չլինի։ Դեղին մամուլը միշտ ավելի շատ տպաքանակ է ունեցել, քան որակյալ մամուլը»։
Մելիքյանի դիտարկմամբ՝ որպեսզի հաղթահարվի ապատեղեկատվությունը, անելիք ունի և՛ պետությունը, և՛ լրագրողական հանրությունը, և՛ հասարակությունը։

«Հասարակությունը չի կարող ձեռքերը ծալել ու ասել՝ ինձ որակյալ տեղեկատվություն մատուցեք․ պետք է ապատեղեկատվությունը, վիրավորանքը, ատելության խոսքն ու զրպարտությունը մերժելու սոցիալական պահանջ ձևավորվի։
Իսկ պետությունն, իհարկե, պարտավոր է օրենսդրական կարգավորումները վերանայել և այնպիսի միջոցներ ձեռնարկել, որոնք կխրախուսեն որակյալ լրատվությունը և կնպաստեն ապատեղեկատվության նվազմանը։
Ինչ վերաբերում է լրագրողական հանրությանը, ապա ամենամեծ պարտավորությունը հենց նրանցն է․ ժամանակակից աշխարհն ապատեղեկատվության դեմ պայքարելու ավելի էֆեկտիվ միջոց չունի, քան «ֆակտ չեքինգի» հնարավորինս ընդլայնումը, «ֆակտ չեքինգը» պետք է դարձնել մեդիագրագիտության կարևորագույն բաղկացուցիչը։

Եթե չի ստացվում լրագրողական դաշտի ինքնակարգավորումը, հնարավոր է ավելի էֆեկտիվ լինի համակարգավորումը, այսինքն՝ ինքնակարգավորումը օրենսդրական կարգավորման հետ»։

Նշենք, որ Ժողովրդավարության հայկական ֆորումը Freedom House միջազգային իրավապաշտպան կազմակերպության և «Իրազեկ քաղաքացիների միավորման» ջանքերով անցկացվում է արդեն երկրորդ տարին անընդմեջ:

Մանրամասները՝ տեսանյութում։