Ադրբեջանին անկլավները տվել է Մոսկվան․ Բաքուն չունի՛ իրավական հիմքեր՝ ինչպես են գոյացել դրանք․ Ռուբեն Գալչյան․ ՏԵՍԱՆՅՈՒԹ

Նիկոլ Փաշինյանն ասուլիսում փակագծեր բացեց Ադրբեջանի տարածքային ամբողջականության ճանաչման, 1975 թվականի քարտեզի հիման վրա դեմարկացիա և դելիմիտացիա անցկացնելու, անկլավների մասին։ 1975 թվականի քարտեզները, որոնց հիմքով կողմերը ճանաչում են միմյանց տարածքային ամբողջականությունը, ներառում են նաև անկլավները․ «29 հազար 800-ի մեջ մտնում է նաև Արծվաշենը։ 86 հազար 600-ի մեջ այդ հաշվարկներով մտնում են նաև անկլավները։ Մենք էլի ասում ենք՝ սա քաղաքական որոշում է, բայց հարցի իրավական մասը դեռ պետք է դիտարկել և նայել»,- ասել է Փաշինյանը։

Factor TV-ին տված հարցազրույցում քարտեզագետ, աշխարհագրագետ Ռուբեն Գալչյանն ասում է, որ Ադրբեջանի անկլավները Հայաստանում երեքն են, որոնցից երկուսը Տավուշում են և դրանք տրվել են Ադրբեջանին Մոսկվայի որոշմամբ 1936 թվականին, իսկ մեկն էլ Տիգրանաշենն է, որ Մոսկվան տվել է Բաքվին 1939 թվականին։

«Ես խոսել եմ արխիվի մասնագետների հետ, նրանցից ոչ ոք ոչ մի նյութ չունի, թե ոնց են գոյացել այդ անկլավները։ Նկատի ունեմ՝ իրավական հիմքեր ունեցող փաստաթղթեր, որոշումներ չկան, թե անկլավները ոնց են գոյացել։ Մոսկվան գծել է, տվել է Ադրբեջանին և Հայաստանին՝ ասելով, որ սրանք անկլավներ են։ Եթե պարտադրված լինենք ադրբեջանական ակլավները հետ տալ, կշրջափակենք անկլավները, թույլ չենք տա Ադրբեջանը մտնի-դուրս գա՝ ինչպես իրենք փակել են Արցախի ճանապարհը։ Մենք էլ Ադրբեջանի առաջ կփակենք ճանապարհը դեպի անկլավներ, եթե պարտավորված լինենք անկլավները տալ։ Որպեսզի այդպիսի խնդիրներ չառաջանան, ճիշտը փոխանակումն է, այսինքն՝ ներկա դրության պահպանումը»,- ասաց մասանեգտը։

Հարցազրույցն ամբողջությամբ՝ տեսանյութում։

Ռոբերտ Անանյան