26.06.2026 | 23:30
Հունիսի 29-ին Հայաստանի մի շարք հասցեներում էլեկտրաէներգիայի անջատումներ կլինեն
Քայլ առ քայլ պատասխան ենք տալիս 30 տարի գիտությունն անտեսելու համար, հիմա էլ վտանգի մեջ ենք. Սարգսյան. ՏԵՍԱՆՅՈՒԹ
Հաղորդաշարեր
06.05.2023 | 19:00
«Հայաստանը չունի նավթ, բայց կարող է ինտելեկտուալ պրոդուկտ տալ, որն ավելի կարևոր է: Եթե պետությունը սրան հետամուտ չլինի, և´ ռազմական ոլորտում ենք անկարող լինելու, և´տնտեսական: Գիտելիքահեն տեխնոլոգիաներն են մեզ նման փոքր երկրներին հնարավորություն տալիս ունենալու անվտանգային համակարգ և բարձր կենսամակարդակ»,- Factor TV-ի հետ զրույցում նման տեսակետ է հայտնում ֆիզիկա-մաթեմատիկական գիտությունների դոկտոր, պրոֆեսոր, Հայ-Ռուսական համալսարանի Ինժեներաֆիզիկական ինստիտուտի տնօրեն, Սանկտ-Պետերբուրգի պոլիտեխնիկական համալսարանի պրոֆեսոր Հայկ Սարգսյանը:
Նրա խոսքով` Հայաստանը պետք է ձևակերպի հստակ նպատակ` ունենալ կիրթ հասարակություն և գնալ դեպի տեխնոլոգիական ապագա.
«Դեռևս Ապրիլյան պատերազմից հետո գիտական հանրությունն ասում էր, որ ապագա պատերազմները տեխնոլոգիաների պատերազմներ են: Եվ եթե պետությունը չֆինանսավորի գիտությանը, թանկ կվճարենք…Մենք թանկ վճարեցինք: 2020-ը հստակ ցույց տվեց` ինչ բացեր ունենք: Կրթությունը քաղաքական գործոն է. պատերազմը դա հուշեց»: Հայկ Սարգսյանը նկատում է` պետությունը, որն ունի տեխնոլոգիա, կարողանում է թելադրել քաղաքական պայմաններ. «Քայլ առ քայլ պատասխան ենք տալիս 30 տարի շարունակ գիտությունն անտեսելու համար, և այսօր էլ կանգնած ենք վտանգի առաջ: Ընդ որում, պետք է նաև գիտակցենք, որ տեխնոլոգիաները միանգամից չեն ստեղծվելու, ժամանակ է պետք, պետությունը պետք է ներդրում անի` թեկուզ տասը տարի հետո դրա արդյունքը քաղելու ակնկալիքով»:
Ֆիզիկոսը խոսում է նաև ԳԱԱ հետազոտական ինստիտուտները բուհերին միավորելու` կառավարության ծրագրի մասին` նշելով, որ չի կարելի նման գործընթացը հապճեպ իրականացնել.
«Պետք է զգույշ լինել, որպեսզի չվնասել ակադեմիայի ինստիտուտներին: Կարելի է մի քանի ինստիտուտների և բուհեր փորձնական միավորել, հասկանալ` որոնք են խոչընդոտները, վերլուծություն անել, տեսնել` ինչ ուղիներ է պետք գտնել վերջնարդյունքի համար, և հետո նոր անցնել բուն միավորման պրոցեսին: Ի վերջո, պետք է ձևակերպել` որն է ինտեգրացիայի բուն նպատակը և երկխոսել ակադեմիայի հետ, շտապել չի կարելի»: Հայկ Սարգսյանն անդրադառնում է նաև Հայաստանում տարիներ շարունակ ձևավորված գիտնականի կերպարին` կարծիք հայտնելով, որ այդ ուղղությամբ հակաքարոզ է իրականացվել. «Գիտնականները 30 տարի շարունակ ներկայացվեցին որպես նվնվացող, փող մուրացող, վատ հագնված, անպաշտպան կերպարներ, այսպես ասած` «ինժեներ բալաներ»: Կիրթ մարդը տարիներ շարունակ Հայաստանում հիմար մարդու հոմանիշն է եղել, և ես ձեզ ասեմ` քրեական հեղինակությունների, զոռբաների կուլտն էլ հանգեցրեց 2020-ի աղետին»:
Մանրամասները` տեսանյութում:
Աննա Բաբաջանյան
