11.04.2026 | 22:24
Այցելել եմ երեկվա ողբերգական վթարից տուժած փոքրիկներին․ Ավանեսյան
Մադրիդյան սկզբունքներով ՀՀ-ն Ղարաբաղը ճանաչել է որպես Ադրբեջանի մաս․ Փաշինյան․ ՏԵՍԱՆՅՈՒԹ
Քաղաքականություն
12.04.2023 | 16:56
Մադրիդյան սկզբունքներով Հայաստանը Լեռնային ղարաբաղը ճանաչել է Ադրբեջանի մաս։ ԱԺ–ում կառավարության հետ հարցուպատասխանի ժամանակ այս հայտարարությունն արեց ՀՀ վարչապետ Նիկոլ Փաշինյանը` անդրադառնալով դիտարկմանը, որ երբ հայկական կողմն ասում է, որ Ադրբեջանից տարածքային պահանջներ չունի, դա ասոցացվում է ԼՂ–ից հրաժարվելու հետ։
«Մենք ֆունդամենտալ պետք է անդրադառնանք այն կոնցեպտին, որով հետապնդվել է ԼՂ հարցը մեր անկախության տարիների ընթացքում։
Անկհայտորեն այդտեղ ունենք 2 մաս` մինչև Մադրիդյան սկզբունքները և դրանից հետո։ Մինչև Մադրիդյան սկզբունքները հայկական կողմի դիրքորոշումն է եղել, որ ԼՂ-ն երբեք չի եղել անկախ Ադրբեջանի կազմում և ԽՍՀՄ փլուզման համատեքստում իրականացրել է իր ինքնորոշման իրավունքը` ստանալով անկախություն։ Սա ֆիքսված է Ալմա Աթայի հռչակագրում․․․․
2007-ին իշխանության փոխանցման շրջանում, երբ Սերժ Սարգսյանը վարչապետ էր, իսկ Ռոբերտ Քոչարյանը նախագահի պաշտոնն էր զբաղեցնում, առաջ եկան Մադրիդյան սկզբունքները, որտեղ ընդգծվում էին տարածքային ամբողջականության և ինքնորոշման սկզբունքները»,- նշեց վարչապետը։
Փաշինյանի խոսքով` այդտեղ նշվում էր նաև, որ պետք է ճշգրտվի ԼՂ կարգավիճակը՝ ինչ-որ մեխանիզմով, և դրա մեխանիզմը պետք է համաձայնեցված լինի նաև Ադրբեջանի կողմից։
«Այդպիսով՝ շատ լրջագույն կոնցեպտուալ փոփոխություն է տեղի ունեցել․․․ Այդ սկզբունքների հեղինակը, ըստ որոշ հավաստի տեղեկությունների, հայկական կողմն է եղել․․․
Այստեղ հարց է ծագում` եթե ԼՂ-ն մենք, դուք, իրենք չեն համարում Ադրբեջանի մաս, ինչո՞ւ պետք է կարգավիճակի հարցը համաձայնեցվի Ադրբեջանի հետ։
Ինքնորոշվել նշանակում է լինել որևէ տեղ և տեղափոխվել մեկ այլ տեղ. Մադրիդյան սկզբունքներից առաջ ԼՂ-ի համար այդ տեղը Խորհրդային Միությունն էր, իսկ Մադրիդյան սկզբունքներից հետո Ադրբեջանն է։
Այդ տրամաբանությունը, որ նրանք դրել են, նշանակում է, որ ԼՂ–ն Ադրբեջանի մաս է կամ պետք է լինի Ադրբեջանի մաս, որ ինքնորոշվի։ Հակառակ դեպքում ումի՞ց է ինքնորոշվում»,- նշեց Փաշինյանը` հավելելով, որ սա իրենց մեծագույն բացթողումն է, որի մասին 2018-ից հետո չեն խոսել և ժողովրդին բացատրել այս ամենը։
«Մեր սխալն է, որ պետք է այն ժամանակ կանգնեինք, ասեինք՝ ժողովո՛ւրդ, սա է վիճակը, եկեք որոշենք՝ ինչ ենք անելու։ Մենք մտածել ենք, որ ինչ-որ ձևերով այս թակարդից հնարավոր է դուրս գալ կամ գոնե մեր պարտքն է մեզնից կախվածն անել այդ թակարդից դուրս գալու համար։ Բայց քանի որ թակարդը միջազգայնորեն համաձայնեցված էր, մենք չկարողացանք դա անել»,- ասաց Փաշինյանը։
Մանրամասները՝ տեսանյութում։
