07.12.2025 | 21:40
Վարդենյաց լեռնանցքում ձյուն է տեղում. Դիլիջանի, Սպիտակի ոլորաններում մառախուղ է
Օպերային երգիչ Լիպարիտ Ավետիսյանը մեծ հաջողությամբ ելույթ ունեցել է Բուենոս Այրեսի Կոլոն թատրոնում
Մշակույթ
24.03.2023 | 12:19
Շառլ Գունոյի «Ֆաուստ» օպերայում մարտի 14, 16, 19 և 21-ին օպերային երգիչ Լիպարիտ Ավետիսյանը ելույթներ է ունեցել Կոլոն թատրոնում` Ֆաուստի դերերգով:
«Արմենպրես»-ի հաղորդմամբ՝ հեղինակավոր MusicaClasicaBA ամսագիրը գրում է. «Ֆաուստը՝ երիտասարդ հայ տենոր Լիպարիտ Ավետիսյանը, տիրապետում է գեղեցիկ քնարական ձայնի՝ օժտված է բնական հնչեղությամբ: Նա գերազանց ցուցադրում է իր վոկալային կարողությունները և լավագույնս է ներկայացնում այն ամենը, ինչը պահանջում են թե՛ երաժշտական պարտիտուրը, թե՛ դրամատիկ կերպարը» (MusicaClasicaBA, 17.03.2023):
Մեկ այլ պարբերականում նշվում է, որ Լիպարիտ Ավետիսյանը բացեց երեկոն Salut Ô mon dernier matin արիայի արժանի կատարմամբ և շարունակեց դերը՝ ցուցադրելով բարձր վարպետություն, ինչն առավել վառ արտահայտվեց դերերգի ամենաքնարական հատվածներում, ինչպիսին է դյութիչ Salut demeure-ը, որը հորդում էր այնպես ազատ ու թեթև, ինչպես պահանջում է պարտիտուրը (Clarín.com 15.03.2023):
Գյոթեի փիլիսոփայական դրամայի հիման վրա գրված Շառլ Գունոյի համանուն «Ֆաուստ» օպերայով Կոլոն թատրոնը բացել է իր թատերաշրջանը: Այն հինգ գործողությամբ ֆրանսիական գրանդ օպերա է՝ բալետային խմբով և հզոր երգչախմբով: Ներկայացման բեմադրող ռեժիսորը, սցենարիստը, խորեոգրաֆը, հագուստների և լույսերի նկարիչը մեր օրերի ամենապահանջված մասնագետներից իտալացի Ստեֆանո Պոդան է, իսկ երաժշտական ղեկավարը՝ բրիտանացի դիրիժոր Յան Լաթամ-Քոենիգը: Մեֆիստոֆելի դերում հանդես է եկել ռուս հզոր բաս Ալեքսեյ Տիխոմիրովը, իսկ Մարգարիտի դերում՝ ռումինացի սոպրանո Անիտա Հարթինգը, որը տպավորիչ միջազգային կարիերա է կերտում: Ներկայացումը բեմադրված է եղել աբստրակտ, պոետիկ ոճով, այն հարուստ է սիմվոլիկ, փիլիսոփայական և լիտուրգիական էլեմենտներով:
2022-2023 թվականների թատերաշրջանում Լիպարիտ Ավտիսյանն արտերկրում հանդես է եկել Semperoper Dresden-ում, Մարիինյան թատրոնում (Ալֆրեդո, «Տրավիատա»), Թուլուզի Théâtre du Capitole -ում (Ռոդոլֆո, «Բոհեմ»), Բոլշոյում (Կոմս Ալմավիվա, «Սևիլյան սափրիչ»): Առաջիկայում հանդես կգա Գլայնդբորնի փառատոնում (Նեմորինո, «Սիրո ըմպելիք») և Թագավորական օպերային թատրոնում, Քովենթ Գարդեն (Ալֆրեդո, «Տրավիատա»):
Ապրիլի 11-ին Ալ. Սպենդիարյանի անվան ազգային ակադեմիական օպերայի և բալետի թատրոնում կկայանա Լիպարիտ Ավետիսյանի մենահամերգը:
