08.10.2026 | 23:18
Քննարկվել են ՀՀ-ի և Իրանի մաքսային մարմինների միջև նախնական էլեկտրոնային տվյալների փոխանակման համակարգի գործարկման քայլեր
ԵՄ-ն քննադատել է Ադրբեջանի Կուսակցությունների մասին նոր օրենքը
Քաղաքականություն
23.03.2023 | 22:21
ԵՄ-ն մտահոգություն է հայտնել Ադրբեջանում Քաղաքական կուսակցությունների մասին նոր օրենքի կապակցությամբ։ Այս մասին ասվում է ԵՄ արտաքին գործերի և անվտանգության քաղաքականության ծառայության խոսնակ Պետեր Ստանոյի հայտարարության մեջ։
«Եվրամիությունը մտահոգված է Քաղաքական կուսակցությունների մասին նոր օրենքով սահմանված սահմանափակումների կապակցությամբ։ Այն կարող է սառեցնող ազդեցություն ունենալ քաղաքական բազմակարծության և հիմնարար իրավունքների ու ազատությունների վրա, ինչպիսիք են Ադրբեջանում միավորումների ազատությունը, արտահայտվելու ազատությունը և խաղաղ հավաքների ազատությունը: Այս իրավունքները հիմնարար են ժողովրդավարական հասարակության գործունեության համար»,- ասվում է հայտարարության մեջ։
ԵՄ-ն կոչ է անում Ադրբեջանին՝ անդրադառնալ Եվրոպայի խորհրդի Վենետիկի հանձնաժողովի առաջարկություններին քաղաքական կուսակցությունների մասին նախորդ օրենքի վերաբերյալ, ինչպես նաև նոր օրենքի վերաբերյալ Վենետիկի հանձնաժողովի և ԵԱՀԿ/ԺՀՄԻԳ-ի մարտի 13-ի կարծիքին:
«Քաղաքական կուսակցությունները, որպես քաղաքական արտահայտման հիմնական հավաքական գործիքներ, նպաստում են քաղաքացիների քաղաքական կամքի բարձրաձայնմանը։ Կենսունակ, հաշվետու և ներառական բազմակուսակցական համակարգերը պետք է երաշխավորվեն»,- ասվում է հայտարարության մեջ։
Հավելենք, որ օրերս էլ ԱՄՆ Պետքարտուղարության խոսնակ Նեդ Փրայսն էր հայտնել Վաշինգտոնի անհանգստությունն այս օրենքի առնչությամբ։
«ԱՄՆ-ն անհանգստացած է Ադրբեջանի կողմից Քաղաքական կուսակցությունների մասին վերջին օրենքի կապակցությամբ։ Մենք կոչ ենք անում իշխանություններին՝ հաշվի առնել Վենետիկի հանձնաժողովի և ԵԱՀԿ/ԺՀՄԻԳ-ի առաջարկությունները և հարգել հիմնարար ազատությունները, այդ թվում՝ միավորումների»,- գրել էր Փրայսը թվիթերյան իր էջում։
Հավելենք, որ վերջերս Ադրբեջանում ընդունվել է նոր օրեք, որը սահմանափակում է ընդդիմության գործունեության՝ առանց այն էլ սահմանափակ տարածքը։ Եվրոպայի խորհրդի Վենետիկի հանձնաժողովը և ԵԱՀԿ Ժողովրդավարական հաստատությունների և մարդու իրավունքների գրասենյակը քննադատել են նոր օրենքը՝ նշելով, որ այն «ներդնում է մի շարք նոր խնդրահարույց դրույթներ, որոնք զսպող ազդեցություն ունեն երկրում բազմակարծության վրա»։
Էմմա Չոբանյան
