26.07.2026 | 12:28
Վթարային ջրանջատում Երևանում և Արարատում
ՄԱԿ-ի տվյալներով՝ երկրաշարժի հետևանքով Թուրքիայում առնվազն 1,5 մլն անօթևան է դարձել
Քաղաքականություն
23.02.2023 | 20:24
Թուրքիայի հարավում տեղի ունեցած ավերիչ երկրաշարժերից և տասնյակ հետցնցումներից հետո առնվազն 1,5 միլիոն մարդ անօթևան է դարձել, միաժամանակ, 500,000 նոր տուն պետք է կառուցվի։ Այս մասին գրում է Turkish Minute-ը՝ վկայակոչելով ՄԱԿ-ի զարգացման ծրագրի (ՄԱԶԾ) փորձագետներին:
«Սա ակնհայտորեն ամենամեծ աղետն է Թուրքիայի պատմության մեջ, հավանաբար, ամենամեծ բնական աղետը, որին երկիրը երբևէ բախվել է»,- ասել է ՄԱԿ-ի Զարգացման ծրագրի Թուրքիայի մշտական ներկայացուցիչ Լուիզա Վինթոնը:
Փետրվարի 6-ի երկրաշարժերը և դրան հաջորդած հետցնցումները Թուրքիայում խլել են ավելի քան 43,000 մարդու կյանք, շուրջ 100,000 վիրավոր կա։ Երկրաշարժից տուժած նահանգներում հազարավոր մարդիկ զրկված են խմելու ջրից և սանիտարահիգիենիկ միջոցներից։
Վինթոնը նաև նշել է, որ մարդիկ շտապ բնակարանի կարիք ունեն։ Բացի այդ, տարածաշրջանում 116-ից մինչև 210 միլիոն տոննա փլատակներ պետք է մաքրվեն, ինչը լուրջ մարտահրավեր է։
Հավելենք, որ ՄԱԿ-ը հանդես է եկել 1 միլիարդ դոլարի ֆինանսավորման կոչով՝ աջակցելու միլիոնավոր մարդկանց Թուրքիայում, և առաջարկել է հետագա աջակցություն տարածաշրջանի վերականգնմանն ուղղված ծրագրերին:
Էմմա Չոբանյան
