28.04.2026 | 09:52
Դատախազությունում տեղի են ունեցել կադրային փոփոխություններ
Թուրքիայում ընտրությունները 99,9 տոկոսով կանցկացվեն մայիսի 14-ին․ թուրք իշխանամետ լրագրող
Քաղաքականություն
23.02.2023 | 16:42
Թուրքիայի նախագահական և խորհրդարանական ընտրությունները 99,9 տոկոս հավանականությամբ տեղի կունենան մայիսի 14-ին։ Այս մասին հայտարարել է իշխանական շրջանակներին մոտ կանգնած թուրք լրագրող Հանդե Ֆիրաթը, գրում է Gercek News-ը։
Ֆիրաթը CNN Turk-ին ասել է, որ իշխող «Արդարություն և զարգացում» կուսակցության բարձրաստիճան պաշտոնյաները երկու հանդիպում են անցկացրել ընտրությունների օրվա հետ կապված քննարկումների համար։
«Այս հանդիպումների արդյունքներով՝ 99,9 տոկոս հավանականությամբ ընտրությունները կկայանան մայիսի 14-ին»,- ասել է նա։
Ըստ լրագրողի՝ հանդիպումների ընթացքում արված տեխնիկական գնահատումների արդյունքը ներկայացվել է նաև Թուրքիայի նախագահ Ռեջեփ Թայիփ Էրդողանին, որն էլ իշխանություններին հրահանգել է անել այն, ինչ տեխնիկապես անհրաժեշտ է մայիսի 14-ին կայանալիք ընտրությունների համար։
Փետրվարի 6-ին Թուրքիայում տեղի ունեցած ավերիչ երկրաշարժերից հետո ընտրությունների հետաձգման հարցը դարձել է քննարկումների առարկա։ Անցյալ շաբաթ Էրդողանի ղեկավարած իշխող կուսակցության պաշտոնյան Reuters-ին ասել էր, որ երկրաշարժերից հետո «ֆիզիկապես պայմանները հարմար չեն» ընտրությունները ժամանակին անցկացնելու համար՝ ազդարարելով դրանք նոյեմբեր տեղափոխելու մասին:
Ընդդիմադիր կուսակցությունները, մյուս կողմից, կտրականապես մերժում են քվեարկության հետաձգումը՝ հայտարարելով, որ նման քայլը հարված կլինի ժողովրդավարությանը, քանի որ այն հակասում է Թուրքիայի Սահմանադրությանը:
Էմմա Չոբանյան
