14.12.2025 | 21:40
Ոստիկանությունը ձերբակալել է Բրաունի համալսարանում կրակ բացելու մեջ կասկածվողին
Արդարադատության միջազգային դատարանն Ադրբեջանին պարտավորեցրեց ապահովել Լաչինի միջանցքով անխափան տեղաշարժը
Քաղաքականություն
22.02.2023 | 19:47
ՄԱԿ-ի Արդարադատության միջազգային դատարանը հրապարակել է Լաչինի փակման միջանցքի վերաբերյալ ժամանակավոր որոշումը ու բավարարել Հայաստանի միջնորդությունը՝ Ադրբեջանին պարտավորեցնելով ապահովել տրանսպորտի և մարդկանց անխափան տեղաշարժը Լաչինի միջանցքով՝ երկու ուղղություններով։
Մասնավորապես, ՄԱԿ-ի դատարանն Ադրբեջանին պարտավորեցրել է՝
1․Դադարեցնել աջակցությունը ենթադրյալ «բողոքի ակցիաների» կազմակերպմանը, որոնք արգելափակում են անխափան ազատ տեղաշարժը Լաչինի միջանցքով երկու ուղղություններով:
2․ Ապահովել երկու ուղղություններով բոլոր մարդկանց, տրանսպորտային միջոցների ու բեռների անխափան տեղաշարժը։
«Դեկտեմբերի 12-ից կապը Լաչինի միջանցքով խաթարված է, խոչընդոտվել է Լեռնային Ղարաբաղ սննդամթերքի, դեղորայքի և անհրաժեշտ այլ ապրանքների մատակարարումը, ինչն անուղղելի վնաս կարող է պատճառել։ Դատարանը համարում է, որ ժամանակավոր միջոց կիրառելն անհրաժեշտ է։ Դատարանն արձանագրում է, որ Ադրբեջանը պարտավոր է ձեռնարկել միջոցներ՝ Լաչինի միջանցքով մարդկանց ու բեռների անխափան շարժը երկու ուղղությամբ ապահովելու համար»,- ասվում է որոշման մեջ։
Դատարանի որոշման մեջ նշվում է, որ ՀՀ-ն հայցել է, որպեսզի դատարանը միջոցներ կիրառի, որոնցով կկարգադրի, որ Ադրբեջանը դադարեցնի կազմակերպել ու աջակցել ենթադրյալ բողոքի ցույցերին, որոնք արգելափակում են Լաչինի միջանցքով անխափան տեղաշարժը 2 ուղղություններով։ Դատարանը համարում է, որ այս ժամանակավոր միջոցը Լաչինով տեղաշարժվելու առումով հիմնավորված չէ։
Միաժամանակ, դատարանը որոշել է, որ 2021-ի դեկտեմբերի 7-ի որոշման ժամանակավոր միջոցներն ուժի մեջ են մնում։ Դատարանի որոշումները պարտադիր են կատարման համար և առաջացնում են միջազգային պարտավորություն բոլոր այն կողմերի համար, որոնց վերաբերում է դա։
Տաթև Ֆռանգյան
